Atyraýdaǵy Zaroslyı jáne Gogolskıı kanaldaryn tereńdetý qashan aıaqtalady

ATYRAÝ. KAZINFORM – Atyraý qalasynyń mańyndaǵy 3-shi jáne 6-shy ózekte, Prımorskıı kanalyndaǵy túp tereńdetý jumysy aıaqtaldy.

Atyraý oblystyq qurylys, sáýlet jáne qala qurylysy basqarmasy basshysynyń orynbasary Talǵat Bısenniń aıtýyna qaraǵanda, Zaroslyı kanalynyń túbin tereńdetý jumystary jalǵasyp jatyr. Bul kanaldyń uzyndyǵy – 26 shaqyrym.

– Túp tereńdetý jumystarynyń basty maqsaty – Jaıyq ózeniniń sý ótkizý qabiletin arttyrý. Bul jumys ózenge balyqtyń mol kirýine de áser etedi. Al atalǵan tórt kanaldyń jalpy uzyndyǵy 50 shaqyrymdy quraıdy. Osy kezge deıin 2,6 shaqyrym aýmaqta tereńdetý júrgizildi, - deıdi Talǵat Bısen.

Onyń aıtýynsha, byltyr Jaıyq ózeniniń teńizge quıar saǵasyn tereńdetý bastalǵan. Josparǵa sáıkes uzyndyǵy 10 shaqyrym, eni 20 metr aýmaqty 2 metrge deıin tereńdetý kózdelgen.

– Byltyrdan beri josparlanǵan jumystyń 70 paıyzy atqaryldy. Qazir aýa raıyna baılanysty jumys ýaqytsha toqtap tur. Muz erigen soń qaıta jalǵasady. Ótken jyly bastalǵan jumystyń biri – Atyraý qalasyń mańyndaǵy Gogolskıı kanalyn tereńdetý. Uzyndyǵy 33 shaqyrymdyq kanaldyń 14,3 shaqyrymy tereńdetildi. Kanaldyń eni 18, tereńdigi 2 metrdi quraıdy. Bıyl bul kanaldy tereńdetýdi aıaqtaý josparlanyp otyr, - dep málim etti Talǵat Bısen.

Al «Týhlaıa balka» býlandyrý alańynyń mańyndaǵy Teplyı kanalyn tereńdetý tolyq aıaqtalǵan. Tereńdetý jumysynyń nátıjesinde eni 12 metr, uzyndyǵy 10 shaqyrym kanal 2 metrge tereńdetilgen.

Eske sala ketelik, buǵan deıin Atyraý oblysynda 51 eldi mekendi tasqyn sý basý qaýpi baryn jazǵan bolatynbyz.