Atyraýdaǵy túrmege dronmen esirtki tektes zat pen nasybaı kirgizbek bolǵan
ATYRAÝ. KAZINFORM — Atyraýdaǵy erler túrmesine dron arqyly tyıym salynǵan zattardy jetkizý áreketiniń joly kesildi. Ushqyshsyz ushý apparatynyń janynan ósimdik tektes zat salynǵan 11 paket pen nasybaı salynǵan 2 paket tabyldy.
Qazaqstan Respýblıkasy ІІM Ulttyq ulanynyń «Batys» óńirlik qolbasshylyǵynyń málimetinshe, 5546 áskerı bóliminiń áskerı qyzmetshileri Qylmystyq-atqarý júıesi departamentiniń qyzmetkerlerimen birlesip, mekeme aýmaǵyna qonǵan drondy anyqtaǵan.
— Jedel sharalar nátıjesinde ushqyshsyz ushý apparatynyń janynan túıinshek tabylǵan. Ony tekserý barysynda jasyl tústi, ózine tán ıisi bar ósimdik tektes zat salynǵan 11 paket jáne nasybaı salynǵan 2 paket anyqtaldy, — dep habarlady «Batys» óńirlik qolbasshylyǵynyń baspasóz qyzmeti.
Atalǵan derek boıynsha materıaldar odan ári tekserý júrgizý úshin quzyretti organdarǵa tapsyrylǵan. Oqıǵanyń mán-jaıy tekserý nátıjesinde anyqtalmaq.
Mundaı jaǵdaı 15 qyrkúıekte de tirkelgen edi. Ol kezde áskerı bólim qyzmetkeri túrmeden bir shaqyrym qashyqtyqta qyzmet atqaryp júrgen kezde jerde jatqan oramy bar drondy baıqaǵan.
