Atyraýdaǵy tasqynnan búlingen kópirdiń qurylysy uzaqqa sozylyp ketti
ATYRAÝ.KAZINFORM – Jylyoı aýdany Qulsary qalasynda 2 jyl buryn tasqyn saldarynan búlingen kópirdi kúrdeli jóndeý jumysy sozylyp ketti. Oǵan bul jumysqa jaýapty bolǵan alǵashqy merdiger mekemeniń birneshe márte qurylys jumysyn negizsiz toqtatýy sebep bolǵan.
Aýdan ákimdiginiń málimetinshe, Qulsary qalasy Ulyqpan Abdrahmanov kóshesindegi avtomobıl kópirin kúrdeli jóndeý jobasy aıasynda 2025 jyldyń aqpan aıynda tender jarııalanyp, «MarsStroı» JShS-men kelisimshart jasaldy. Alaıda merdiger jumysty birneshe márte sebepsiz toqtatyp, kesteden keshikken. Keıin shart bir jaqty tártippen úzilgen.
Bastapqy jospar boıynsha bul jumys 4 aıda, ıaǵnı ótken jyldyń qazanynda aıaqtalýy tıis edi. Kópir qurylysynyń negizgi quny 330 mln teńgeni quraıdy. Al atalǵan merdiger mekeme 40 mln teńgesin ǵana ıgergen.
Osy jyldyń basynda ákimdik qaıtadan konkýrs jarııalap, «BÝKA» JShS jeńimpaz atanǵan.
- Qazir qurylys-montaj jumysy júrgizilip jatyr. Kópirdiń eki jaq bóliginiń betondaý jumystary tolyqtaı aıaqtaldy. Kópir arqalyqtaryn ornatý jumystaryna daıyndyq júrgizilip jatyr, sondaı-aq kópir arqalyqtaryn jetkizý kútilip otyr. Qurylys-montaj jumystaryn bastaý týraly habarlamaǵa (talonǵa) sáıkes, nysan boıynsha qurylys jumystaryn aıaqtaý osy jyldyń shilde aıyna josparlanǵan,-dep málimdedi aýdan ákimdiginiń baspasóz qyzmeti.
Resmı derekke súıensek, qurylysqa qajetti blok materıaldaryn Aqtóbe qalasynan osy aıdyń sońyna deıin jetkizý josparlanyp otyr.
Buǵan deıin Atyraý qalasynyń Kóktem yqshamaýdanynyń turǵyndary 5 jyldan beri aýyz sý qysymynyń tómendigine shaǵymdanyp kele jatqanyn jazǵan edik.
