Atyraýdaǵy tasqyn: Qyzylqoǵa sharýalaryna 62 mln teńge ótemaqy taǵaıyndaldy
ATYRAÝ. KAZINFORM – Bıylǵy kóktemde Atyraý oblysyndaǵy Qyzylqoǵa aýdanynda Oıyl ózeni tasyp, jurtty ábigerge salǵan edi. Sý tasqynynan zardap shekken sharýalarǵa 62 mln teńgege jýyq ótemaqy taǵaıyndaldy.
Atyraý oblysy ákiminiń baspasóz qyzmetinen málim etkendeı, bul aýdanda 58 sharýa qojalyǵy men turǵyndardyń ólgen maly úshin eseptelgen shyǵyn ótelip jatyr.
«Tabıǵı sıpattaǵy tótenshe jaǵdaıdan zardap shekkenderge keltirilgen zııandy baǵalaý jáne óteý jónindegi komıssııaǵa mal shyǵyny boıynsha túsken ótinishtiń bári qaraldy. Komıssııanyń qorytyndysymen 58 sharýa qojalyǵy men jeke tulǵalardyń 191 maly úshin bıýdjetten jáne ózge kózderden 61 mln 772 myń 062 teńge ótemaqy taǵaıyndaldy», - dep habarlady ákimdiktiń baspasóz qyzmeti.
Ótemaqyǵa alǵandardyń biri – Jasulan Esqalıev. Biraz jyl buryn «Dáýren» sharýa qojalyǵyn qurǵan.
«Komıssııaǵa sý tasqynynan bolǵan shyǵynǵa baılanysty qujattarymdy jınaqtap, tapsyrǵan edim. Soǵan baılanysty ótemaqy berildi. Ótemaqy qarjysynan sharýa qojalyǵymdaǵy úıim men saraıymdy jańarttym. Jylqy sanyn kóbeıttim. Úsh iri qara mal satyp alyp, qojalyǵymdaǵy jumysymdy qalpyna keltirdim. Qazir sharýa qojalyǵymnyń jumysy retteldi. Eńdigi maqsatym – mal sanyn áli de kóbeıtip, sharýashylyǵymdy odan ári damytý», - deıdi Jasulan Esqalıev.
Eske sala ketelik, buǵan deıin Qulsaryda sý tasqynynan zardap shekken otbasy ótemaqyǵa kottedj satyp alǵanyn habarlaǵan bolatynbyz.
