Atyraýdaǵy tanymal karerge kólikpen kirý aqyly boldy
ATYRAÝ. KAZINFORM — Atyraý oblysynyń Inder aýdanyndaǵy demalýshylar jıi baratyn karerge kirý aqyly boldy. Inderbor kenti ákimdigi men kásipker arasynda jasalǵan memorandýmǵa sáıkes, aýmaqty kútip ustaý men qaýipsizdikti qamtamasyz etý mindetin alǵan kásipker endi turaq qyzmeti úshin ár avtokólikten 1000 teńge alady.
Aýdan ákimdiginiń resmı aqparatyna súıensek, Inderbor kenti, Qorǵantaý ýchaskesindegi ken orny jaǵalaýynda ornalasqan 28 gektar aýmaqta 2026 jylǵy maýsymdyq kezeńde demalys qyzmetin uıymdastyrý maqsatynda Inderbor kenti ákimdigi men kásipker arasynda ózara yntymaqtastyq týraly memorandým jasaqtalǵan.
— Memorandýmǵa sáıkes kásipkerge atalǵan aýmaqtyń sanıtarııalyq tazalyǵyn qamtamasyz etý, demalysqa qajetti ınfraqurylymdy ornalastyrý, sýǵa túsý kezeńinde qaýipsizdik talaptarynyń saqtalýyn qamtamasyz etý, eskertý belgileri men aqparattyq taqtaıshalardy ornalastyrý, sondaı-aq Qazaqstan Respýblıkasynyń ekologııalyq jáne sanıtarııalyq zańnamasynyń talaptaryn saqtaý mindetteri júktelgen, — dep habarlady aýdan ákimdiginiń baspasóz qyzmeti.
Qazirgi ýaqytta kásipker tarapynan atalǵan aýmaqta maýsymdyq qyzmetti uıymdastyrý jáne aýmaqty kútip ustaý jumysy júrgizilip jatyr. Týrısterdiń tańdaýy ádette halyq jıi keletin orynǵa túsedi. Kún jylynysymen karer aınalasy qoqysqa tolyp, kóptiń narazylyǵyn týdyrady.
Karerdi kútip ustaýǵa jaýapty kásipker áleýmettik jelidegi paraqshasy arqyly demalys ornyna kirý úshin turaq qyzmetine ár mashınaǵa 1000 teńge tóleý kerektigin habarlady. Adam sanyna aqy alynbaıdy. Tómenge kólikpen túspeı jaıaý kirýge de bolady. Bul úshin de tólem jasap qajet emes.
— Jańa eki ájethana bar. Internetpen qamtylyp jatyr. Dýsh qyzmeti qarastyrylady. Jabyq sákiler qoıý josparda bar, — dep pikir bildirdi Qýat Janeseev.
Inder aýdanynda osyndaı 20-dan asa karer bar. Kezinde borat óndirilgennen keıin sol kúıinde qalǵan. Astynan sý shyǵyp, arnasy tolǵan.
Buǵan deıin atyraýlyqtar men týrısterge lotosty julmaý jóninde eskertý jasaldy.
