Atyraýdaǵy Tańdaı – H.Erǵalıev aýyldaryna qatynaıtyn jolda bóget alynyp jatyr

ATYRAÝ. KAZINFORM – Atyraý oblysyndaǵy Tańdaı-H.Erǵalıev aýyldaryna qatynaıtyn joldyń jıegindegi bóget alynyp jatyr.

Mahambet aýdanynyń tótenshe jaǵdaılar jónindegi jedel shtabynyń málimetine qaraǵanda, tasqyn sýdy ótkizý úshin osyndaı sheshim qabyldanǵan. H.Erǵalıev aýyly Isataı aýdanynyń aýmaǵynda ornalasqan. Al Tańdaı – Mahambet aýdanyndaǵy eldi meken.

«Eki aýyldyń aralyǵyn jalǵaıtyn joldy sý baspaý úshin eki jıegine topyraq tógilgen. Alaıda joldyń 13-shaqyrymy tusyna tasqyn sý mol jınalǵan. Sol sebepten, joldyń kelesi jaǵyndaǵy jaıylmaǵa sý jiberý úshin qorǵanys bógetin ashýǵa sheshim qayldandy. Mundaı sheshim birneshe maqsatty kózdeıdi. Birinshiden, Tańdaı aýylyn, ekinshiden, sharýa qojalyqtaryn, úshinshiden, joldan 4 shaqyrym qashyqta ornalasqan «Korovnık» qystaýyn tasqyn sýdan qorǵaý kózdelip otyr», - dep habarlady Mahambet aýdanynyń tótenshe jaǵdaılar jónindegi jedel shtaby.

Eske sala ketelik, buǵan deıin Atyraý-Dossor trassasyndaǵy kópirdiń asty keńeıtilýi múmkin ekenin habarlaǵan bolatynbyz.

Sondaı-aq, Jaıyq ózeniniń Kaspıı teńizine quıar saǵasy 1,5 metrge tereńdetilgenin jazǵan edik.