Atyraýdaǵy Sokolok kanalynan 1 kúnde 4,2 mln shabaq qutqarylyp, Jaıyqqa jiberilgen

ATYRAÝ. KAZINFORM – Atyraý oblysynda balyq shabaqtaryn qutqarý jalǵasyp jatyr. Máselen, Sokolok kanalynan 1 kúnde 4 mln 215 myń shabaq qutqarylyp, Jaıyq ózenine  jiberilgen.

Jaıyq-Kaspıı oblysaralyq basseındik balyq sharýashylyǵy ınspektsııasynyń málimetine qaraǵanda, kóktemgi kezinde Jaıyq ózeninen jaıylma men kanaldarǵa shyqqan sýdan balyq shabaqtary áli qutqarylyp jatyr.

Máselen, keshe, 18 qyrkúıekte Sokolok kanalynan shabyq qutqarý sharasy uıymdastyrylǵan. Oǵan ınspektsııanyń bólimderinen, jergilikti atqarýshy organnan, «Saǵıeva» sharýa qojalyǵy men 99245 áskerı bóliminen 72 adam jumylǵan. Sondaı-aq, ınspektsııadan 3, «Saǵıeva» sharýa qojalyǵynan 1 KamAZ ben 2 pıkap kóligi tartylǵan.

«Kanal sýynan arnaıy aý quralymen súzilip alynǵan balyq shabaqtary avtokólikpen Mahambet aýdanyndaǵy Alǵa aýylynyń tusyna deıin tasymaldanyp, Jaıyq ózenine jiberildi. Tabıǵı ortasyna jiberilgen shabaqtyń árqaısysynyń salmaǵy shamamen – 15-20 gramm. Osylaısha 18 qyrkúıekte Sokolok kanalynda qalyp qoıǵan 4 mln 215 myń balyq shabaǵy qutqaryldy», -dep habarlady ınspektsııadan.

Balyq shabaqtaryn qutqaryp, sý aıdynyna tirileı jiberý jumysyy áli de jalǵasady.

Eske sala ketelik, budan buryn Atyraýda maýsymnan beri 49,9 mln balyq shabaǵy qutqarylǵanyn habarlaǵan bolatynbyz.