Atyraýdaǵy «Shańyraq» balalar aýylynyń júrgizýshisi jasóspirimdi nege urǵan

ATYRAÝ. KAZINFORM – Atyraýdaǵy «Shańyraq» otbas úlgisindegi balalar aýylynda júrgizýshiniń jasóspirimdi nege urǵany anyqtaldy.

Atyraý oblystyq bilim basqarmasynyń basshysy Marat Ábýovtiń aıtýynsha, «Shańyraq» otbasy úlgisindegi balalar aýyly men jasóspirimder úıinde zerdeleý jumystary júrgizilgen.

– Zerdeleýge sáıkes mekemeniń jedel jaǵdaıdaǵy qyzmettik kóliginiń júrgizýshisi 2024 jyly 24 shilde kúni tárbıelenýshi-jasóspirimge sport zalda qol kótergeni anyqtaldy. Onyń bul áreketine jasóspirimniń júrgizýshiniń adamdyq ar-namysyna tıetin sózderdi aıtqany sebep bolǵan.

Alaıda, psıhologpen áńgimelesý kezinde jasóspirim júrgizýshimen ázildesip, oınaıtynyn, oǵan renjimeıtinin, ókpe-renishi joqtyǵyn, óziniń kináli ekenin aıtty, - dep habarlady Marat Ábýov.

Basqarma basshysynyń málimetinshe, otbasy úlgisindegi balalar aýylynda 8 úı bar. Onyń 7-eýinde 36 bala tárbıelenedi. Mekemede 57 beınekamera qondyrylǵan. Kameranyń 2-eýi jedel basqarý ortalyǵyna qosylyp tur. Munda 56 adam jumys isteıdi. Onyń ishinde 7 adam ana-tárbıeshi qyzmetin atqarady.

Al kezekshilik 2 ana-tárbıeshige júktelgen. 

– Polıtsııa departamenti atalǵan derekke qatysty is qozǵady. Qazir tergeý jumystary júrgizilip jatyr, - dep málim etti Marat Ábýov. 

Atyraý oblysy boıynsha bala quqyqtary jónindegi ýákil Aıjan Sársembaevanyń aıtýyna qaraǵanda, mekemede polıtsııa, prokýratýra, bilim basqarmasy jáne ákimdik ókilderiniń qatysýymen jıyn ótken. 

– Oqıǵa byltyrǵy shilde aıynda bolǵanymen, polıtsııada atalǵan fakti tirkelmegen. Endi atalǵan derek boıynsha QR Qylmystyq kodeksiniń 140-babynyń 2- bóligimen qylmystyq is tirkeldi, - dep málim etti Aıdan Sársembaeva.

Eske sala ketelik, budan buryn Atyraýdaǵy «Shańyraq» balalar aýylynyń júrgizýshisi tárbıelenýshini urǵanyn habarlaǵan bolatynbyz.