Atyraýdaǵy shańdy daýylǵa sebep bolǵan 4 ýchaske anyqtaldy
ATYRAÝ. KAZINFORM – Atyraýda keıingi kúnderi tirkelgen shańdy daýyldar men topyraq aralas jańbyr óńirdegi ekologııalyq ahýaldyń kúrdelene túskenin kórsetti. Mamandar bul qubylystyń negizgi sebebin Kaspıı teńizi deńgeıiniń tómendeýimen baılanystyryp otyr.
Ekologııa departamenti basshysynyń orynbasary Erlan Esenovtiń aıtýynsha, teńiz deńgeıiniń tómendeýi saldarynan buryn sý astynda bolǵan aýmaqtar ashylyp qalǵan.
– Kaspıı teńiziniń deńgeıi tómendegen saıyn buryn sý astynda jatqan jerler qurǵap, olardyń betinde tuz ben usaq qum jınaldy. Jeldiń áserinen bul bólshekter aýaǵa kóterilip, qala aýmaǵyna taralýda. Bul ekologııalyq jaǵdaıdyń kúrt nasharlaýyna áser etti, - dedi ol.
Qazirgi ýaqytta jaǵalaý aımaǵy men qala aýmaǵyndaǵy topyraqtan synama alynyp, keshendi zerthanalyq saraptamalar bastaldy. Nátıjesi tabıǵı qubylystyń naqty sebepterin anyqtaýǵa múmkindik bermek.
Atyraý oblysy ákiminiń orynbasary Jasulan Bısembıevtiń aıtýynsha, qalada shańdy tumannyń qalyptasýyna teńiz jaǵasynda anyqtalǵan 4 ýchaske áser etýi múmkin. Óıtkeni, ol aýmaqtarda qamys sııaqty ósimdikter joq. Ákimdik ókilderdi aýaǵa kóteriletin shań men tuz kólemin azaıtý úshin ylǵaldandyrý tehnologııasynyń qarastyrylyp jatqanyn aıtty.
– Aldyn ala málimetke sáıkes, jel ońtústik-shyǵystan soqqanda qalada shań paıda bolyp tur. Zerdeleı kele qalanyń ońtústik-shyǵys baǵytynan sorly aımaqtar anyqtaldy . Sor deýge de kelmeıdi, bul jerde topyraqtyń quramy – jeńil. Qatty jel kúni osy jerdegi topyraq qalada shańnyń paıda bolýyna áser etedi. Bul jerde ósimdik joq. Osyndaı aımaqtarda ósimdik bolsa shańdy ustar edi. Teńiz tartylyp jatqandyqtan mundaı ýchaskeler kóbeıip kele jatyr. Bizdiń maqsat ýchaskelerdi anyqtap , shańdy toqtatý sharalaryn qolǵa alyp jatyrmyz, - dedi oblys ákiminiń orynbasary Jasulan Bısembıev.
Osy jerdegi topyraqtyń quramy qaladaǵy shańnyń quramymen sáıkes keletin bolsa jospar jasalyp, iske kóshemiz deıdi sheneýnikter. Qurǵap qalǵan aýmaqtardyń qasynda kanaldar júrip jatyr. Ósimdikter ekken jaǵdaıda sýarý máselesi týyndamaıtyn kórinedi.
Aıta keteıik, óńirde qalyptasqan jaǵdaıǵa baılanysty sebepterdi anyqtaý maqsatynda jumys toby quryldy, Kaspıı teńiziniń tartylǵan aýmaqtaryna áýeden monıtorıng júrgizildi. Jumys tobynyń quramyna oblys ákimdigi, ekologııa departamenti, tótenshe jaǵdaılar departamenti jáne qorshaǵan ortany qorǵaý salasynyń mamandary kiredi.
Buǵan deıin oblys ákimdigi 2026 jyl qum kóshkinine qarsy sekseýil nemese jyńǵyl egý jumystary júrgizbeıtinin jazǵan edik.
