Atyraýdaǵy shalǵaı aýyldyń halqy sport kesheniniń qurylysyn jandandyrýdy suraıdy
ATYRAÝ. KAZINFORM – Qurmanǵazy aýdany Azǵyr óńirine qarasty Súıindik aýylynda dene shynyqtyrý kesheni uzaqqa sozylǵan qurylystardyń birine aınalǵan. Buǵan deıin jaýaptylar nysandy ótken jyldyń sońyna deıin paıdalanýǵa beremiz dep ýáde etken. Alaıda búginge deıin qurylys jumystary tolyq aıaqtalmaǵan.
Qazirgi tańda nysan aýmaǵyn aram shóp basyp, qurylys materıaldary shashylyp jatyr. Syrtqy kelbeti daıyn bolǵanymen, ishki árleý jumystary júrgizilmegen. Aýyl turǵyndarynyń aıtýynsha, 48 oryndyq sport kesheniniń qurylysy bastalǵanyna úsh jyldan asqan. Soǵan qaramastan, jastar áli kúnge deıin jattyǵý úshin aýdan ortalyǵyna qatynaýǵa májbúr.
Súıindik aýyldyq okrýginiń turǵyny Baqtygereı Seıithanovtyń sózinshe, nysannyń ýaqtyly tapsyrylmaýy aýyl jastarynyń qalaǵa kóshýine áser etip otyr.
– Osy úsh-tórt jyldan beri sport kesheniniń qurylysy bitpeı jatyr. Byltyr jeltoqsanda tapsyrylýy kerek edi. Biraq jumys aıaqsyz qaldy. Aýyl jastary qalaǵa ketip jatyr. Sebebi munda sportpen aınalysatyn da, jumys isteıtin de oryn joq. Qazirgi qarqynmen bul nysannyń bıyl aıaqtalatynyna senim az, - dep pikir bildirdi aýyl úlkeni.
Aýdan ákimdiginiń málimetinshe, nysannyń qurylysyna «Nomad Qurylys Kompanııasy» JShS jaýapty. Jalpy quny 1 mlrd 67 mln teńge bolatyn nysannyń jobasy 2022 jyly daıyndalǵan. Alaıda qurylys materıaldarynyń qymbattaýy men jobalyq-smetalyq qujattamaǵa túzetýler engizý qajettiligine baılanysty jumys ýaqytsha toqtap qalǵan.
Qurmanǵazy aýdany qurylys bóliminiń málimetine súıensek, qurylys-montajdaý jumystary 2023 jyldyń 10 qazanynda bastalǵan. Búginde jobaǵa ózgerister engizý máselesi qaralyp jatyr.
– Qazirgi tańda jobalaý-smetalyq qujattamany túzetýge baılanysty qurylys toqtap tur. Buǵan qurylys materıaldarynyń qymbattaýy jáne qujattamada tasymaldaý shyǵyndarynyń eskerilmeýi sebep boldy. Oblystyq bıýdjettik komıssııanyń qorytyndysy kútilýde. Búginge deıin 405 mln teńge ıgerildi, - dep málimdedi aýdandyq qurylys bólimi.
Belgili bolǵandaı, merdigerge qarastyrylǵan qarjynyń jartysyna jýyǵy ǵana aýdarylǵan. Buǵan deıin aýdan ákiminiń orynbasary merdiger mekemeniń jumysty baıaý júrgizgenin atap ótken bolatyn. Qazirgi tańda qurylystyń qashan qaıta bastalatyny jáne nysannyń naqty qashan paıdalanýǵa beriletini belgisiz.
Buǵan deıin Qurmanǵazy aýdanynyń ortalyǵyndaǵy stadıondy jańǵyrtý jumysy aıaqsyz qalǵanyn, merdiger mekemeniń jumysty ýaqytyly oryndamaýy sebep bolyp otyrǵanyn jazǵan edik.
