Atyraýdaǵy sibir jarasy: oblys ákimi jaǵdaıdy baqylaýǵa aldy
ASTANA. KAZINFORM – Atyraý oblysynyń ákimi Serik Shápkenov óńirdegi Sibir jarasynyń taralý jaǵdaıy baqylaýda ekenin aıtty.
— Sibir jarasy tirkelgen sátten bastap qala ákiminiń sheshimimen mal satatyn oryn tolyǵymen karantınge jabyldy. Sol jerdegi bar mal esepke alynyp, arnaıy vaktsınatsııadan ótti. Qazir karantınde tur, dezınfektsııa jumystary júrgizilip jatyr, ár ýaqytta synamalar alynady. Sonymen qatar sol jerde jumys istegen 62 jumysshyny tizimge alyp, monıtorıngte ustap otyrmyz. Ókinishke qaraı, 2 adamnan sibir jarasyn juqtyrý faktisi anyqtaldy. Qazir jaǵdaılary jaqsy, medıtsınalyq kómekti tolyq alyp jatyr, — dedi Serik Shápkenov oblystyń bıylǵy áleýmettik-ekonomıkalyq damýy týraly esep berý barysynda BAQ ókilderiniń saýalyna jaýap bere turyp.
Óńir ákiminiń aıtýynsha, Sibir jaras oshaǵyn joıý máselesi jiti baqylaýda.
— Sonymen qatar basqa da et satatyn oryndarda tekserý jumysyn júrgizemiz. Basqa da oryndardy monıtorıng júrgizip, synama aldyq. Qaýipsizdik sharalary kúsheıtildi. Biz BQO, Aqtóbe oblysynan mal alamyz, biz arqyly Mańǵystaý oblysyna mal jiberiledi, sondyqtan oblysqa kiretin, oblys arqyly mal ótkizýdi baqylaýda ustap otyrmyz, — deıdi ol.
Eske sala ketsek, Atyraýdaǵy «Asyl-Agro» sharýa qojalyǵynyń mal soıý pýnktinde ólgen sıyrdan sibir jarasy tabyldy.
Keıin atalǵan sharýa qojalyǵynyń mal soıý pýnktinde jumys istegen taǵy bir adamnan sibir jarasynyń belgisi anyqtaldy.