Atyraýdaǵy sibir jarasy: Mal bazarynda jumys isteıtin bir adam aýrýhanaǵa tústi

ATYRAÝ. KAZINFORM — Atyraýda mal satatyn bazarda ólgen sıyrdan sibir jarasy anyqtalǵan edi. Endi osy bazarda jumys isteıtin bir adam aýrýhanaǵa jatqyzyldy. 

Bul derekti Atyraý oblysy ákiminiń baspasóz hatshysy Rýslan Jumaǵazıev rastady. Onyń aıtýynsha, «Asyl-Agro» sharýa qojalyǵynyń mal soıý pýnkti aýmaǵynda ólgen maldan sibir jarasy tabylǵan. Osyǵan baılanysty 20 qarashada atalǵan bazarda karantın engizildi.

«Ólgen janýarmen qarym-qatynasta bolǵan 16 adamnyń barlyǵy anyqtaldy. Olardy ınfektsıonıst-mamandar tekserip, medıtsınalyq baqylaýǵa aldy. Aldyn ala málimet boıynsha, qasaphananyń bir qyzmetkeri sibir jarasy aýrýynyń alǵashqy belgilerimen aýrýhanaǵa jatqyzyldy. Veterınarııalyq zerthana mıkroskopııa, bıotaldaý jáne PTR kómegimen jınalǵan materıaldardy zerttedi. Bakterıologııalyq zertteýlerdiń nátıjeleri jaqyn kúnderi shyǵady», — dep habarlady Rýslan Jumaǵazıev. 

Onyń aqparatyna súıensek, Aqtóbe qalasynan epızootııalyq otrıad kelgen. Otrıad quramyndaǵy mamandar bazarlarda dezınfektsııa jumystaryn bastady. Bul sharalar ınfektsııanyń yqtımal taralýyn boldyrmaýǵa baǵyttalyp otyr. Barlyq qajetti veterınarlyq-sanıtarlyq sharalar qoldanystaǵy algorıtmge sáıkes qatań túrde júrgiziedi.

Al, oblystyq densaýlyq saqtaý basqarmasy basshysynyń mindetin atqarýshy Almıra Sabyrǵalıevanyń pikirinshe, sibir jarasy adamnan adamǵa juqpaıdy. 

«Bul ınfektsııa aýrý iri qaramen jylqydan, qoı men eshkiden taraıdy. Sibir jarasynyń qozdyrǵyshy adam aǵzasyna negizinen zaqymdalǵan teri arqyly, tynys alý joldarynyń nemese asqazan-ishek joldarynyń shyryshty qabattary arqyly túsedi», — dep málim etti Almıra Sabyrǵalıeva.

Eske sala keteıik, buǵan deıin Atyraýdaǵy mal bazarynda ólgen sıyrdan sibir jarasy anyqtalǵanyn habarlaǵan edik.