Atyraýdaǵy sibir jarasy: Qasaphananyń taǵy bir jumysshysynan aýrý belgisi tabyldy

ATYRAÝ. KAZINFORM – Atyraýdaǵy «Asyl-Agro» sharýa qojalyǵynyń mal soıý pýnktinde jumys istegen taǵy bir adamnan sibir jarasynyń belgisi anyqtaldy.

Atyraý oblysy ákiminiń baspasóz hatshysy Rýslan Jumaǵazıevtiń rastaǵan aqparatyna súıensek, bul – sibir jarasynyń belgisi tabylǵan ekinshi naýqas. 

«Naýqastyń ózi medtsınalyq kómek alýǵa júgingen. Óıtkeni, bul adamda sibir jarasynyń alǵashqy belgileri baıqalǵan. Zerthanalyq taldaý qorytyndysymen aýrý belgisi rastalyp, dıagnoz qoıyldy. Ol medıtsınalyq hattamaǵa sáıkes aýrýhanaǵa jatqyzylyp, em-dom alyp jatyr», -dep habarlady Rýslan Jumaǵazıev.

Onyń málimetinshe, Atyraý oblystyq sanıtarııalyq-epıdemıologııalyq baqylaý departamentiniń mamandary mal soıý tsehtarynan, iri bazarlar men saýda núkteleri sekildi 67 nysannan 700-den astam synama alǵan. Synamalardyń taldaý qorytyndylarynan sibir jarasynyń belgisi tabylmaǵan. 

«Qazir Atyraý oblysynyń aýmaǵyna mal tıegen kólikterdiń kirip-shyǵýy qatań baqylaýǵa alyndy. Polıtsııa jáne veterınarııalyq qadalaý mamandary kólikterdegi maldyń qujatynyń, onyń ishinde juqpaly aýrýlarǵa qarsy vaktsına egilgeni jónindegi anyqtamanyń zańdylyǵyn tekseredi. Kóliktegi maldyń dene qyzýy ólshenedi», -dep málim etti Rýslan Jumaǵazıev.

Sondaı-aq, «Asyl-Agro» sharýa qojalyǵynyń mal soıý pýnkti aýmaǵynda turǵan 225 malǵa vaktsına salynǵan. 

Eske sala ketelik, buǵan deıin Atyraýdaǵy qasaphana jumysshysy sibir jarasynyń jeńil túrin juqtyrǵan habarlaǵan bolatynbyz.