Atyraýdaǵy respýblıkalyq joldarda tekseris júrgizilip, 18 aqaý anyqtaldy
ATYRAÝ.KAZINFORM – Jyl basynan beri Atyraý oblysy aýmaǵyndaǵy respýblıkalyq mańyzy bar avtomobıl joldarynda 12 ret tekseris júrgizilip, nátıjesinde 18 aqaý anyqtaldy. Bul týraly «Jol aktıvteri sapasynyń ulttyq ortalyǵy» RMK Atyraý oblystyq fılıalynyń dırektory Aslan Dıýsenov málimdedi.
Onyń aıtýynsha, tekseris barysynda joldardy kútip-ustaýǵa paıdalanylatyn 13 ınerttik materıaldan synama alynyp, fılıaldyń jol zerthanasynda zerttelgen. Zertteý qorytyndysy boıynsha barlyq synama normatıvtik qujattama talaptaryna tolyq sáıkes kelgen.
– Degenmen jol boıyndaǵy sý ótkizgish qubyrlardyń jabylmaýy jáne qısyq ıindi qorshaýlardyń maıysýy sııaqty kemshilikter anyqtaldy, – dedi Aslan Dıýsenov.
14 -17 qańtar aralyǵynda óńirde jaýǵan qar, boran, qatty jel men kóktaıǵaq saldarynan kólik qozǵalysyna qaýip tónýine baılanysty joldardy qysqy kútip-ustaý jumystary kúsheıtilgen rejımde uıymdastyryldy. Osy kezeńde «QazAvtoJol» UK» AQ-nyń Atyraý oblystyq fılıaly men merdiger uıymdar táýlik boıy jumys atqardy.
«QazAvtoJol» UK» AQ-nyń Atyraý oblystyq fılıalynyń dırektory Ardaq Qaıredenovtyń aıtýynsha, qysqy maýsymǵa daıyndyq aıasynda respýblıkalyq mańyzy bar avtojoldardy kútip-ustaý úshin 6800 m³ taıǵaqqa qarsy materıal, 4150 tonna tehnıkalyq tuz jáne 46 birlik arnaıy tehnıka daıyndalǵan. Qolaısyz aýa raıy kezinde 660 tonna reagent paıdalanylyp, 32 arnaıy tehnıka jumyldyrylǵan.
Qysqy kútip-ustaý jumystary KAZ09 «Aqtóbe – Qandyaǵash – Dossor – Atyraý – RF shekarasy», KAZ12 «Atyraý – Oral», KAZ11 «Dossor – Qulsary – Beıneý – Aqtaý teńiz porty», sondaı-aq KZ06-02 «Mahambet – Hamıt Erǵalıev» jáne KZ06-03 «Dossor aınalma joly» baǵyttarynda júrgizildi.
Atyraý oblysy aýmaǵyndaǵy respýblıkalyq mańyzy bar avtomobıl joldaryn kútip-ustaý jumystary Atyraý qalasy, Mahambet, Qurmanǵazy jáne Maqat eldi mekenderindegi 4 jol paıdalaný ýchaskesi men Qulsary qalasy, Saǵyz, Aqqystaý jáne Inder aýyldaryndaǵy 4 jol paıdalaný bólimshesi arqyly júzege asyrylyp jatyr. Qaýipti ýchaskelerde jol jaǵdaıyna turaqty monıtorıng júrgizilip jatyr.
Eske salaıyq, osyǵan deıin «QazAvtoJol» joldary qaýip týdyrýy yqtımal óńirlerdi ataǵan edi.