Atyraýdaǵy prezıdenttiń burynǵy rezıdentsııasynyń qurylysy nege uzaqqa sozyldy
ATYRAÝ.KAZINFORM — Atyraý oblysy Mahambet aýdanynda ornalasqan prezıdenttiń burynǵy rezıdentsııasyn «Jas Daryn» balalar saýyqtyrý-jattyǵý lagerine aınaldyrý jumysy júrip jatyr. Jobanyń iske asý merzimine 2 jyl buryn bolǵan tasqyn keri áser etken. Aýmaqtyń keı bóligi sý astynda qalǵan.
Bul keshen 2023 jyly kommýnaldyq menshikke berilip, oblystyq bilim berý basqarmasyna qarasty Daryndardy anyqtaý jáne qoldaý ortalyǵynyń balansyna ótti.
Tasqyn saldarynan aýmaqty qurǵatý, qorǵanys bógetin jáne sý burý arnalaryn salý, sondaı-aq jobalyq qujattarǵa ózgerister engizý qajettiligi týyndaǵan. Osyǵan baılanysty qujattardy qaıta rásimdeý men kelisý jumystaryna aıtarlyqtaı ýaqyt ketken.
— Nysan aýmaǵynda keshendi qaıta jańǵyrtý jáne jańa qurylys boıynsha qurylys-montaj jumystary jalǵasyp jatyr.Tasqynnan keıin aýmaqty qurǵatý jumysy júrgizildi. Qaıta sý baspaý úshin bóget pen sý burý kanaly salyndy. Injenerlik qorǵaýdyń jańa talaptaryn eskere otyryp, jobalyq qujattarǵa eleýli ózgerister engizildi. Bul jumystyń barlyǵy qosymsha ýaqytty talap etti, — dep málimdedi oblystyq ákimdiktiń baspasóz qyzmeti.
Ákimdiktiń resmı aqparatyna súıensek, qazirgi ýaqytta oqý ortalyǵy, úsh jataqhana men galereıa ǵımarattarynyń irgetasy men qabyrǵalary tolyq aıaqtalǵan, shatyr jabý jumysy 80 paıyzǵa oryndalǵan. Ákimshilik-medıtsınalyq ortalyq pen ashana ǵımarattarynyń irgetasy tolyq quıylyp, qabyrǵalarynyń basym bóligi turǵyzylǵan. Vızıt-ortalyqtyń qurylysy da jalǵasyp jatyr. Al basseınniń negizgi beton jumystary tolyq aıaqtalǵan.
— Sonymen qatar, jabyq sport zalynyń, trıbýnalary bar ashyq stadıonnyń, garajdyń qurylysy qatar júrgizilip jatyr. Budan bólek, qoldanystaǵy ǵımarattar qonaq úı, konferents-zal, jattyqtyrýshylar úıi, úıirmeler korpýsy, kúzet beketi jáne serverlik bólme retinde qaıta beıimdelip jatyr, — dep tolyqtyrdy oblys ákimdiginiń baspasóz qyzmeti.
Jalpy jańǵyrtý jobasynyń quny 5 mlrd teńge.
Aıta keteıik, jalpy bul joba aıasyndaǵy jumys ótken jyly aıaqtalýy tıis edi. Endi oblys bıligi rezıdentsııany jańǵyrtý jumysyn osy jyldyń sońyna deıin aıaqtaýdy josparlap otyrǵanyn málimdedi.
Byltyr Almatyda Prezıdent rezıdentsııasynyń ornyna saıabaq salynǵan edi.
