Atyraýdaǵy Prezıdenttiń burynǵy rezıdentsııasyn jańǵyrtý jumysy toqtap qaldy
ATYRAÝ.KAZINFORM - Mahambet aýdanyndaǵy Prezıdenttiń burynǵy rezıdentsııasyn balalarǵa arnalǵan demalys lageri retinde jańǵyrtý jumysy toqtap tur. Buǵan jobalyq-smetalyq qujatqa ózgeristiń engizilýi sebep. Bul jobany qarjylandyrýǵa qatysty másele de bar.
2023 jyly rezıdentsııa oblystyq bilim berý basqarmasyna qarasty «Daryn» talanttardy anyqtaý jáne qoldaý ortalyǵyna berildi. Keıin bul aýmaqty balalarǵa arnalǵan demalys ornyna aınaldyrý jumysy bastaldy.
Alǵashqy bekitilgen jobanyń bas jospary boıynsha oqý, jataqhana korpýstary, ashana, basseın, ákimshilik jáne kelýshilerge arnalǵan ǵımarattardyń negizgi qańqasy betonnan quıylǵan. Ázirge lager qurylymynyń ishindegi ǵımarattardan tolyq aıaqtalǵany joq. Keshendi jańǵyrtyp, demalys ornyna aınaldyrý jumysyna jaýapty qurylys basqarmasynyń málimetinshe, búginde jobaǵa ózgerister engizilýine baılanysty qurylys toqtatyldy.
- 2026 jyldyń naýyryz aıynda joba quramy qaıta qaralyp, ózgerister men tolyqtyrylýlar engizildi. Jańadan jabyq sportzal, 4 avtobýsqa arnalǵan jabyq garaj jáne fýtbol alańy, sonymen qatar aýyz jáne káriz sýyn tazalaýǵa múmkindik beretin qondyrǵylardy ornatýǵa jáne osy jobaǵa burynǵy rezıdentsııanyń salýly turǵan ǵımarattaryn qaıta jóndep lagerdiń quramyna engizý jóninde sheshim qabyldandy. Nysannyń ataýy rezıdentsııanyń qoldanystaǵy ǵımarattaryn rekonstrýktsııalaý arqyly jyl boıy jumys isteıtin balalarǵa arnalǵan «Jas Daryn» oqý-jattyǵý lagerin salý bolyp belgilenip, jańa ózgertilgen jobalaý tapsyrmasy berildi. Qazirgi kezde joba memlekettik saraptamadan ótip jatyr,-dep jaýap berdi qurylys basqarmasynyń basshysynyń mindetin atqarýshy Rafık Abýov.
Qurylys basqarmasy ókilderiniń sózinshe, joba qarasha aıynda saraptamadan shyǵady dep josparlanǵan.
Bıyl oblys ákimdigi bul joba jyl sońyna deıin aıaqtalatynyn aıtyp, uzaqqa sozylyp ketýin 2024 jyly bolǵan tasqynmen baılanystyrǵan edi.
Aýmaqtyń keı bóligi sý astynda qalǵan. Basqarmanyń resmı jaýabyna súıensek, bóget salý jumysy tolyq aıaqtalmaǵan.
- Lager aýmaǵy arnaıy zerttelip, sý tasqanynan qorǵaný bógetteri qurylysy bastalǵan, jobalanǵan jumystyń basym bóligi aıaqtaldy. Bóget qurylysy aıaqtalǵan soń tolyq sý tasqynynan qorǵaýǵa jetkilikti,-dep tolyqtyrdy qurylys basqarmasy.
Bir qyzyǵy bul joba úshin áli kúnge qazynadan bir tıyn qaralmaǵan. Alǵashynda ákimdik jumysqa 5 mlrd teńge qarjy qajet ekenin aıtqan. Búginge deıin rezıdentsııany jańǵyrtý jumysyn merdiger, ıaǵnı «BatysAlıansStroı» kompanııasy óz qarajaty esebinen istegen. Naqty qurylys quny saraptamadan keıin belgili bolmaq.
- Birneshe márte ózgerister men tolyqtyrýlar engizilýine baılanysty jobalaý jumysynyń aıaqtalý ýaqyty sozyldy, joba tolyqtaı memlekettik saraptamadan ótpeýine baılanysty qurylys jumystary osy ýaqytqa deıin qarjylandyrylǵan joq,-dep túsindirdi basqarma.
Jobanyń birneshe ret ózgerýi qurylystyń sozylýyna áser etip otyr. Bıyl sáýirde oblys ákimdigi qurylys jumysyn tolyqtaı jyl sońyna deıin aıaqtalatynyn atsa, endi nysandy paıdalanýǵa berý merzimin aldyn ala 2027 jyldyń qyrkúıegine josparlap otyr.
Qurylys basqarmasy merzimniń taǵy keıinge shegerilýi múmkin emes ekenin málimdedi. Degenmen naqty merzim jobanyń memlekettik saraptamasynan keıin aıqyndalady.
Buǵan deıin Atyraý qalasynda Jaıyq ózeni arqyly ótetin jetinshi kópirdiń qurylysy bastalǵanyn jazǵan edik. Bul kópir soltústik aınalma jol jobasynyń quramyna kiredi. Túzetýler men ózgerister bul jobany aınalyp ótpeı, qurylys merzimi birneshe márte birneshe ret keıinge shegerilgen.
