Atyraýdaǵy ózen-kólder mańynda 70 qaýipti ýchaske bar
ATYRAÝ. KAZINFORM — Atyraý oblystyq TJD júrgizgen taldaý nátıjesinde oblys boıynsha sý aıdyndary mańynda 70 qaýipti ýchaske anyqtaldy. Bul týraly oblystyq Tótenshe jaǵdaılardy joıý basqarmasynyń bastyǵy Jantóre Demeshov brıfıng barysynda málimdedi.
Jantóre Demeshovtyń aıtýynsha, kúzgi-qysqy kezeńde sý aıdyndaryndaǵy qaýipsizdikti qamtamasyz etý maqsatynda óńirde keshendi profılaktıkalyq jáne jedel-qutqarý sharalary kúsheıtilgen. Qazir oblys aýmaǵyndaǵy sý aıdyndarynda muzdyń qalyńdyǵy 10–30 santımetr aralyǵynda, alaıda keıbir aýmaqtarda muz tolyq qatpaǵan.
Jazataıym oqıǵalardyń aldyn alý úshin qarasha aıynan beri oblysta 234 reıd ótkizilip, 227 tyıym salý belgisi men 14 aqparattyq banner ornatyldy.
Qutqarý qyzmetteri de joǵary daıyndyq rejımine keltirilgen. Qazirgi ýaqytta oblys boıynsha 72 kásibı qutqarýshy, onyń ishinde 38 súńgýir, 28 birlik tehnıka jáne 23 qaıyq jumyldyrylǵan. Atyraý qalasy men Jylyoı aýdanyndaǵy 3 sýdaǵy qutqarý stantsııasynda táýlik boıy kezekshilik uıymdastyrylǵan.
— Byltyr sý aıdyndarynda 11 adam qaıtys boldy, onyń 5-eýi — bala. Sonymen qatar reıdtik-profılaktıkalyq jumystar barysynda 8 adam, onyń ishinde 1 bala qutqaryldy. Bul kórsetkishter qaýipsizdik talaptaryn qatań saqtaý qajettigin kórsetedi, — dedi J. Demeshov.
Sondaı-aq brıfıngte sý aıdyndaryndaǵy qaýipsizdik erejelerin buzý derekteri boıynsha ákimshilik jaýapkershilik sharalary kúsheıtilgeni aıtyldy. Bıyl QR Ákimshilik quqyq buzýshylyq týraly kodeksiniń 412-baby, ıaǵnı sý aıdyndarynda qaýipsizdik qaǵıdalaryn buzý nemese oryndamaý boıynsha 4 adamǵa ákimshilik hattama toltyryldy.
Osyǵan deıin ShQO qutqarýshylary muz astyna qulap ketken jaǵdaıda ne isteý kerektigin túsindirgeni týraly jazdyq.