Atyraýdaǵy otbasynyń ólimi: kúdikti kúıeýbalanyń psıhıkalyq jaǵdaıyna baǵa beriledi
ATYRAÝ. KAZINFORM – Atyraý oblysy Jangeldın aýylynda bútin bir otbasynyń ólimine kúdikti dep tanylǵan Sultan Sarsemalıevtiń áıeli Aqbaıan Muqanǵalıeva statsıonarlyq keshendi sot-psıhologııalyq-psıhıatrııalyq saraptama júrgizý úshin Almaty qalasyndaǵy sot saraptamalary ınstıtýtyna jiberildi.
Atyraý oblystyq prokýratýrasynyń málimetinshe, kúdikti Sultan Sarsemalıevke de qatysty keshendi sot-psıhologııalyq jáne psıhıatrııalyq saraptama taǵaıyndalǵan. Alaıda onyń qorytyndysy ázirge shyqpady.
– Qazirgi tańda sotqa deıingi tergeý satysynda Aqbaıan Muqanǵalıevanyń áreketterine quqyqtyq baǵa berilmegen jáne oǵan qatysty bultartpaý sharasy tańdalmaǵan. Kúdiktilerdiń is-áreketine túpkilikti quqyqtyq baǵa barlyq mán-jaı anyqtalyp, taǵaıyndalǵan saraptamalardyń qorytyndysy alynǵannan keıin beriledi, - dep málimdedi prokýratýranyń baspasóz qyzmeti.
Qazirgi ýaqytta ata-enesi men áıeliniń baýyrlaryn óltirdi degen kúdikke ilingen Sultan Sarsemalıevke qatysty qylmystyq kodekstiń úsh baby boıynsha is qozǵaldy.
Olar:
• 99-baptyń 2-bóliginiń 1 jáne 13-tarmaqtary – «Eki nemese odan da kóp adamdy birneshe ret óltirý»;
• 188-baptyń 2-bóligi – «Aldyn ala sóz baılasý arqyly adamdar toby jasaǵan urlyq»;
• 190-bap – «Alaıaqtyq».
Qazirgi ýaqytta kúdikti Atyraýda qamaýda otyr.
Naýryz aıynda aıyptalýshy sot sanktsııasymen eki aıǵa qamaýǵa alynǵan edi.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary anyqtaldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Kúdiktiler aqpan aıynyń sońynda Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingender ustalǵan edi.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady. 29 jastaǵy kúdikti burynǵy áıeliniń aǵasy Naýryz Muqanǵalıev pen Meıramgúl Qarabalınany sol jerge kómip ketken.
