Atyraýdaǵy otbasy ólimi: jábirlenýshi tarap kúdiktiden 70 mln teńge moraldyq ótemaqy talap etti

Mundaı talap aryzdy Maqsot Qarabalınnyń týǵan qaryndasy Ádemi Shylmaǵanbetova qoıyp otyr. Onyń aıtýynsha, qandy qylmastan keıin áýletten bereke ketip, týǵan-týystyń densaýlyq jaǵdaılary nasharlaǵan. Sondaı-aq marqumdardyń qadelerin berý kezinde ketken shyǵyn da bar.

Al Násip Óteshqalıevanyń jaqyndary tarapynan moraldyq ne materıaldyq shyǵyn talap etý týraly talap-aryz sotqa túspegen.

Úshinshi jábirlenýshi tarap, Halyqty áleýmettik qorǵaý salasyndaǵy retteý jáne baqylaý komıtetiniń Atyraý oblysy boıynsha departamentine keltirilgen shyǵyn 776 myń teńgeden asady. Bul marqumdardyń zeınataqysy men múgedektigine baılanysty berilgen járdemaqy.

Sotta Sultan Sarsemalıev moraldyq ótemaqy men keltirilgen shyǵyndy tóleýden bas tartpaıtynyn, degenmen qazirgi ýaqytta jekemenshiginde jyljymaıtyn múliktiń joqtyǵy men jaǵdaıynyń tómen ekenin málimdedi.

Sot otyrysyna múrdelerge taldaý júrgizgen sarapshy kelip, múrdelerdegi jaraqattardyń tereńdigi men áseri jóninde pikir bildirdi. Sarapshy Serjan Seıdeshovtyń aıtýynsha, Naýryz Muqanǵalıevtiń denesi 10 aıdan tabylǵannan keıin bas súıegi denesinen bólinip qalýy qalypty jaǵdaı . Múrdeniń shirýi, keı bólikterinde bulshyqetter men tinderdiń bolmaýy da buǵan áser etedi. Naýryz Muqanǵalıevtiń múrdesi tabylǵan kezde onyń bulshyqetteri men tinderi qalǵan bólekterden 10 jaraqat anyqtalǵan.

Al Maqsot Qarabalın, Násip Óteshqalıeva men Meıramgúl Qarabalınaǵa salynǵan jaraqattardyń keıbiriniń tereńdigi 18 santımetrge deıin jetedi. ıAǵnı, úsh adamdy óltirýge paıdalanylǵan pyshaqtyń júzi kem degende 18 santımetr. Sarapshy Meıramgúl Qarabalınanyń múrdesindegi pyshaq jaraqat sany – 32, degenmen bul kúdikti marqumǵa sonshama ret pyshaq tyqty degendi bildirmeıdi dep otyr.

- Pyshaqty bir márte tyqqanda qol sııaqty dene múshelerinde eki jaraqat paıda bolǵan. Sony eskergen jón. Anyqtaý barysynda Meıramgúl Qarabalınany 27 márte pyshaqtaǵan deýge negiz bar, - dedi sarapshy Serjan Seıdeshov.

Sultan Sarsemalıev búgin de Naýryz Muqanǵalıevti ózin ózi qorǵaý úshin, al otbasynyń qalǵan úsh múshesin ádeıi óltirgenin aıtty. Marqumdardyń týystarynan jábirlenýshi taraptyń advokaty qoıǵan suraqtan keıin ǵana keshirim surady. Kúdikti otbasyndaǵy jaǵdaı týraly ózge adamdarǵa tis jaryp aıtpaǵan. Sondyqtan iste Sultannyń sózin rastaıtyn jaqyn týystarynan basqa kýáler bolmady. Olar da kúdikti men marqumdardyń arasyndaǵy kelispeýshilik týraly jiti bilmeıtin bolyp shyqqan edi.

- Jalǵyz ózim qashsam ustatpas edim. Muny ashyq aıtamyn. Áıelimmen alysqa kete almadym, - dedi Sultan Sarsemalıev.

Kúdikti úsh telefondy jıi paıdalanǵan. Sultan Sarsemalıev búgin solardyń birin ashyp, Naýryz Muqanǵalıev pen Maqsot Qarabalınniń qaryndasy Násip Óteshqalıevanyń 2024 jyldyń tamyzynda sóılesken habarlamalaryn kórsetkisi keldi. Kúdiktiń aıtýynsha, bul dıalogta ózine qatysty sózder aıtylǵan. Degenmen ázirge WhatsApp qosymshasyn ashý múmkin bolmady.

Buǵan deıingi sot otyrysynda is boıynsha jınalǵan zattaı dálelder kórsetildi. Olardyń qatarynda marqumdardyń jeke qujattary, bank kartalary, baılanys quraldary jáne qylmysqa qatysty basqa da aıǵaqtar bar.

Sol kúni aıyptalýshy memlekettik aıyptaýshy men jábirlenýshi taraptyń suraqtaryna jaýap berýden bas tartatynyn, alaıda sýdıa men óziniń advokaty qoıǵan suraqtarǵa jaýap berýge daıyn ekenin jetkizgen edi.

Protsess kezinde Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan. 

Sondaı-aq Aqbaıan Muqanǵalıevanyń tergeý kezinde ne aıtqany belgili bolǵan edi.

Aıta keteıik, kúdikti ata-enesin óltirgennen keıin enesiniń altyndaryn lombardqa ótkizgen.

Jangeldın aýylynda marqumdardyń malyn baqqan baqtashyǵa Sultan Sarsemalıev Naýryz Muqanǵalıev bolyp sóılesip, malshyǵa kúnine 3 myń teńge berip otyrǵan.

Ótken sot otyrystarynyń birinde Atyraý qalasynda eki múrde tabylǵan úıdiń ıesine jaldaý aqysy beıtanys adamnan túsip otyrǵany belgili boldy.

Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.

Aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.

Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty. 

Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.

Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.

Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy. 

Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.

Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.

Eske salsaq, Jangeldın aýylynda turatyn otbasy 2025 jyldyń sońynda belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.