Atyraýdaǵy otbasy ólimi: sotta zattaı dálelder kórsetildi
ATYRAÝ. KAZINFORM – Atyraýda tórt adamdy óltirdi dep aıyptalǵan Sultan Sarsemalıevke qatysty sot otyrysynda is boıynsha jınalǵan zattaı dálelder kórsetildi. Olardyń qatarynda marqumdardyń jeke qujattary, bank kartalary, baılanys quraldary jáne qylmysqa qatysty basqa da aıǵaqtar bar.
Sot zalyna qapshyqqa salynyp, ákelingen zattardyń arasynda Meıramgúl Qarabalınanyń múrdesin oraǵan kilem, marqumdardyń deneleri tabylǵan kezdegi kıimderi, eki úıden alynǵan basqa da zattaı dálelder bar. Olarda qan daqtary bolǵandyqtan jáne ıis shyǵatyndyqtan taraptardyń kelisimimen kórsetpedi.
Memlekettik aıyptaýshy jeke qujattardy, bank kartalary men telefondar men planshetti kórsetti. Olardyń qatarynda kúdiktiniń eki balasynyń, Aqbaıan Muqanǵalıevanyń jáne anasynyń bank kartasy bar. Kúdikti bul zattardy ózimen birge shetelge alyp ketken.
Sultan Sarsemalıev zattardy kórsetý barysynda úsh telefondy jıi paıdalanǵanyn, nómirdi solarǵa salyp otyrǵanyn aıtty. Sýdıa kúdiktiden marqumdardyń Qazposhta kartalarynyń qupııasózin qaıdan biletinin surady.
- Jeke qujattardyń arasynda ol kartalardyń qupııasózderiniń tizimi boldy. Zeınetaqy men járdemaqyny bireýi baryp, ákeletin bolǵan, - dedi kúdikti Sultan Sarsemalıev.
Marqumdardy óltirýge paıdalanylǵan eki pyshaq tabylmaǵan.
Búgingi sot otyrysynda memlekettik aıyptaýshy aldaǵy otyrysqa múrdelerdegi jaraqattarǵa taldaý júrgizgen sarapshyny shaqyrýdy usyndy. Kóptiń saýaly Naýryz Muqanǵalıevtiń basy denesinen ajyrap qalýyna baılanysty. Kúdikti Sultan Sarsemalıev qaıynaǵasynyń denesi 10 aı buryn tabylǵanyn alǵa tartyp, súıegi tartyp shyǵarylǵannan keıin bólinip qalǵan degen oıyn jetkizdi.
Alaıda taraptar kásibı mamannyń pikirin bilý úshin sarapshy shaqyrý týraly usynysty qoldady.
Búgin aıyptalýshy memlekettik aıyptaýshy men jábirlenýshi taraptyń suraqtaryna jaýap berýden bas tartatynyn, alaıda sýdıa men óziniń advokaty qoıǵan suraqtarǵa jaýap berýge daıyn ekenin jetkizgen edi.
Buǵan deıingi sot otyrysynda Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan.
Sondaı-aq Aqbaıan Muqanǵalıevanyń tergeý kezinde ne aıtqany belgili bolǵan.
Kúdikti ata-enesin óltirgennen keıin enesiniń altyndaryn lombardqa ótkizgen.
Jangeldın aýylynda marqumdardyń malyn baqqan baqtashyǵa Sultan Sarsemalıev Naýryz Muqanǵalıev bolyp sóılesip, malshyǵa kúnine 3 myń teńge berip otyrǵan.
Ótken sot otyrystarynyń birinde Atyraý qalasynda eki múrde tabylǵan úıdiń ıesine jaldaý aqysy beıtanys adamnan túsip otyrǵany belgili boldy.
Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara-tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.
Aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken.
Al Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Marqumdardyń qyzy men baýyry bolyp esepteletin Aqbaıan Muqanǵalıevanyń adam óltirý faktisine qatysy joq ekeni belgili boldy.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni anyqtaldy.
Eske salsaq, Jangeldın aýylynda turatyn otbasy 2025 jyldyń sońynda belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
