Atyraýdaǵy otbasy ólimi: kúdikti sotta marqum qaıynaǵasynyń aýdıojazbasyn tyńdatty
ATYRAÝ. KAZINFORM — 4 adamnyń ólimine qatysty sot otyrysynda aıyptalýshy Sultan Sarsemalıev óz telefonynda saqtalǵan aýdıojazbany dálel retinde usynyp, ony marqum Naýryz Muqanǵalıev tarapynan aıtylǵan qoqan-loqqymen baılanystyrdy.
Kúdiktiniń sózinshe, janjal 2024 jyly Túrkııaǵa sapar kezinde bastalǵan. Sol ýaqytta onyń júkti jubaıynyń densaýlyǵyna baılanysty dárigerler medıtsınalyq kórsetkishpen túsik jasatýdy usynǵan. Keıin Qazaqstanǵa oralǵan soń Naýryz Muqanǵalıev pen týystary júktilikti toqtatýdy talap etken, alaıda Sultan Sarsemalıev buǵan kelispegen.
Kúdikti sotqa usynǵan alǵashqy aýdıojazbada Naýryz Muqanǵalıevtiń jaqyndarynyń birine aıtqan sózi estildi.
— Biz aralaspasaq, ol otbasyn asyraı almaıtyn adam. Aldymen Aqbaıan jazylyp ketsin. Sosyn sóılemesiz, — delingen aýdıojazbada.
Sotta tyńdalǵan kelesi aýdıojazbada Naýryzdyń Sultanǵa «Jaýapqa tartam, súmireıtip tastaımyn» degen sózder aıtqan. Aıyptalýshy bul sózderdi ózine tikeleı jasalǵan qoqan-loqqy retinde qabyldaǵanyn málimdedi.
Kúdikti aýdıojazbany 2024 jyldyń 5 qańtarynda ózi izdeýge júrgennen keıin telefonyna muqııat saqtap qoıǵanyn túsindirdi.
Aıyptalýshynyń sózinshe, Naýryz Muqanǵalıev tarapynan bolǵan turaqty psıhologııalyq qysym men ómirine tóngen qaýip týraly qorqynysh ony osyndaı áreketke ıtermelegen. Sot protsesi 23 mamyr kúni jalǵasady.
Buǵan deıin jábirlenýshi tarap kúdiktiden 70 mln teńge moraldyq ótemaqy talap etkenin jazǵan edik.
Aıyptalýshy Sultan Sarsemalıev buǵan deıingi sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
Osydan burynǵy sot otyrysynda is boıynsha jınalǵan zattaı dálelder kórsetildi. Olardyń qatarynda marqumdardyń jeke qujattary, bank kartalary, baılanys quraldary jáne qylmysqa qatysty basqa da aıǵaqtar bar.
Protses kezinde Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan.
Sondaı-aq Aqbaıan Muqanǵalıevanyń tergeý kezinde ne aıtqany belgili boldy.
Aıta keteıik, kúdikti ata-enesin óltirgennen keıin enesiniń altyndaryn lombardqa ótkizgen.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty. Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Eske salsaq, Jangeldın aýylynda turatyn otbasy 2025 jyldyń sońynda belgisiz jaǵdaıda joǵalyp ketken edi. 6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Marqumdardyń qyzy men baýyry esepteletin Aqbaıan Muqaǵalıevanyń adam óltirý faktisine qatysy joq ekeni anyqtaldy.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni aıtyldy.
