Atyraýdaǵy otbasy ólimi: kúdikti 4 adamdy óltirgennen keıin Mekkege baryp kelgen
ATYRAÝ.KAZINFORM – Atyraýda tórt adamdy óltirdi dep aıyptalǵan Sultan Sársemalıev sot otyrysynda alǵash ret jaýap berip, qylmysqa jetkizgen jaǵdaılar týraly óz nusqasyn aıtty.
Sotta aıyptalýshy memlekettik aıyptaýshy men jábirlenýshi taraptyń suraqtaryna jaýap berýden bas tartatynyn, alaıda sýdıa men óziniń advokaty qoıǵan suraqtarǵa jaýap berýge daıyn ekenin jetkizdi.
Sultan Sarsemalıevtiń aıtýynsha, burynǵy jubaıynyń týystarymen aradaǵy uzaq jyldarǵa sozylǵan túsinispeýshilik pen janjal otbasynyń buzylýyna alyp kelgen. Ol qaıyn enesi tarapynan qysym bolǵanyn jáne otbasy ishindegi daýlar keıinnen ýshyqqanyn aıtty.
- Barlyq qylmysty sanaly túrde jasadym. Olar úshin jaýap berýge daıynmyn. Uzaq ýaqyt boıy ishimde jınalǵan ashý men kektiń qorytyndysy dep esepteımin. Eń negizgi sebebi – áıelimniń otbasynyń 5 balama jáne shańyraǵyma aralasýy, - dedi kúdikti.
Aıyptalýshy sotta 2024 jyly bolǵan oqıǵalarǵa da toqtalyp, sol kezeńde ashý-yzanyń kúsheıgenin, emotsııalyq kúızelis jaǵdaıyna túskenin málimdedi. Sonymen birge ol keıbir áreketterin ózin-ózi qorǵaý ýájimen túsindirýge tyrysty.
- 2022 jyldan 2025 jylǵa deıin Atyraý qalasynda turdyq. Sol kezde qaıynjurtym bizdiń otbasyma shekten tys aralasyp bastady. Ózderiniń degenderimen júrgizgisi keldi. Shekten tys qarjylandyrǵanyn, shekten tys kómekteskenin moıyndaımyn. Kómekten bas tartsam da «joq» dep, meni adam qurly kórmeı, aqsha berip otyrdy, - dedi sotta kúdikti Sultan Sarsemalıev.
Aıyptalýshy qylmystan keıingi áreketterin de sıpattap, josparlanǵan qadamdar bolǵanyn jáne keıin elden tys jerge ketkenin rastady. Áıeliniń áke-sheshesi men baýyrlaryn óltirgennen keıin Mekkege baryp kelgenin aıtty. Ol sol jaqta ózine qol jumsaǵasy kelgen. Degenmen birneshe kúnnen keıin anasy habarlasyp, Aqbaıannyń jaǵdaıy nasharlap jatqanynan habardar etipti. Sodan keıin kúdikti oıynan qaıtyp, elge oralǵan.
Buǵan deıingi sot otyrysynda Sultan Sarsemalıevtiń tergeý kezindegi vıdeosy kórsetildi. Onda ol qylmysty jasyrýǵa sheshim qabyldaǵanyn jáne qaıynapasynyń jaǵdaıyna alańdamaǵanyn aıtqan.
Sondaı-aq Aqbaıan Muqanǵalıevanyń tergeý kezinde ne aıtqany belgili bolǵan.
Jalpy sotta kúdiktiniń enesiniń altyndaryn lombardqa ótkizgeni kórsetildi.
Jangeldın aýylynda baqtashy marqumdardyń malyn kúnine 3 myń teńgege baqqan.
Ótken sot otyrystarynyń birinde Atyraý qalasynda eki múrde tabylǵan úıdiń ıesine jaldaý aqysy beıtanys adamnan túsip otyrǵany belgili boldy.
Jalpy sotqa deıingi tergeý kezinde kúdiktiniń 2 advokaty bolǵan. Qazir Sultan Sarsemalıevti bireýi qorǵap jatyr. Advokat Asan Jumabaev sottalýshyny qazir kináli dep aıtýǵa erte ekenin málimdegen edi.
Kúdikti 2024 jyly kásipkerlik nysandardyń birine jaldamaly jumysshy bolyp, jer qazyp, qoqys shyǵarǵan. Sultan men jumys bergen kásipker bir yqshamaýdanda turǵan. Ara tura bir-birin kórgennen keıin aǵa-ini bolyp aralasqan. Kýá sol kezde Sultan Sarsemalıevtiń qara jumysqa ıkemdi, qoly mashyqtanǵan, jerdi jalǵyz ózi qazatyn qaıratty ekenin aıtqan.
Aıyptalýshy Sultan Sársemalıev sotta qaıynaǵasy Naýryz Muqanǵalıevti qasaqana emes, ózin-ózi qorǵaý maqsatynda óltirgenin málimdedi.
Sot otyrysy kezinde memlekettik aıyptaýshy da, aıyptalýshy da qylmysqa otbasylyq janjal sebep bolǵanyn aıtty.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Tergeý barysynda Sultan Sarsemalıev Naýryz Muqanǵalıevti mamyr aıynda ózi qalada jalǵa alǵan úıinde óltirip, úı irgesine kómip tastaǵany belgili bolǵan.
Al qarasha aıynda kúdikti bir pyshaqpen úsh adamdy óltirgen. Jangeldın aýylyna barǵan kezde ata-enesi Maqsot Qarabalın men Násip Óteshqalıevany óltirip, saraı ishine kómip ketken. Al. Meıramgúl Qarabalınany Atyraýda ýaqytsha turyp jatqan úıine ákelip, pyshaq jaraqatyn salǵan. Saldarynan ol da kóz jumdy.
Marqumdardyń qyzy men baýyry dep esepteletin Aqbaıan Muqaǵalıevanyń adam óltirý faktisine qatysy joq ekeni belgili boldy.
Sultan Sarsemalıevke júrgizilgen psıhıkalyq saraptamanyń nátıjesinde onyń aqyl-esi durys ekeni belgili boldy.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
