Atyraýdaǵy Ortalyq kópirdiń tsıfrlyq kóshirmesi ázirlenedi
ASTANA. KAZINFORM — «QazjolǴZI» AQ Atyraý qalasyndaǵy Ortalyq kópirdi keshendi tekserýge kiristi. Mamandar uzyndyǵy 260 metr bolatyn nysannyń qazirgi tehnıkalyq jaı-kúıin baǵalap, ony ári qaraı qaýipsiz paıdalaný sharttaryn aıqyndaıdy.
Tekserý aıasynda geodezııalyq ólsheýler júrgizilip, betonnyń beriktigi anyqtalady, tirek bólikteri men kópirdiń basqa da konstrýktsııalyq elementteriniń jaı-kúıi tekseriledi. Keshendi jumystar yqtımal deformatsııalardy anyqtaýǵa jáne qurylystyń naqty jaǵdaıy týraly obektıvti derekter alýǵa múmkindik beredi.
Egjeı-tegjeıli taldaý júrgizý úshin QazjolǴZI mamandary kópirdiń tsıfrlyq kóshirmesin ázirlep jatyr. Tsıfrlyq model ólsheýler men tekserýlerdiń nátıjelerin biriktirip, baqylaý esepterin júrgizýge, jekelegen elementterdiń jumysyn taldaýǵa jáne ártúrli júktemeler kezindegi konstrýktsııalardyń jaı-kúıin boljaýǵa múmkindik beredi.
Tsıfrlyq kóshirme Kópirlerdi paıdalanýdy basqarý júıesine (KPBJ) engiziledi. Bul nysannyń tehnıkalyq jaı-kúıi týraly málimetterdi júıeleýge, júrgizilgen tekserýlerdiń nátıjelerin jınaqtaýǵa jáne alynǵan derekterdi aldaǵy paıdalaný is-sharalaryn josparlaý kezinde qoldanýǵa múmkindik beredi.
— Ortalyq kópir qalanyń kólik júıesi úshin mańyzdy nysan bolyp sanalady. Jergilikti atqarýshy organdardyń ony keshendi tekserý týraly sheshimi mundaı qurylystardy paıdalaný ǵylymı negizdelgen tásildi qajet etetinin túsinetinin kórsetedi. Zertteýler, synaqtar men ınjenerlik esepteýler nysannyń qazirgi jaı-kúıin obektıvti baǵalaýǵa jáne aldaǵy ýaqytta qabyldanýy tıis sharalardy aıqyndaýǵa múmkindik beredi, — dedi «QazjolǴZI» AQ Kópir qurylystary, avtomobıl joldarynyń dıagnostıkasy jáne qaýipsizdigi departamentiniń dırektory Shalqar Qaısar.
Jumystyń negizgi kezeńderiniń biri dınamıkalyq synaqtar. Olar paıdalaný júktemeleriniń áseri kezinde kópir konstrýktsııalarynyń naqty jumysyn baǵalaýǵa jáne alynǵan kórsetkishterdi eseptik parametrlermen salystyrýǵa múmkindik beredi.
Keshendi tekserý, synaqtar men baqylaý esepteýleriniń qorytyndysy boıynsha QazjolǴZI tehnıkalyq qorytyndy daıyndaıdy. Qujatta Ortalyq kópirdiń qazirgi jaı-kúıine baǵa berilip, ony ári qaraı qaýipsiz paıdalanýǵa qatysty usynymdar usynylady.
Aıta ketelik Atyraýdaǵy alty kópirdiń tehnıkalyq jaǵdaıy zertteletini týraly jazǵan edik.
