Atyraýdaǵy ortalyq kópirde toq soqqan azamattar kinálilerdiń zań aldynda jaýap bergenin qalaıdy
ATYRAÝ. KAZINFORM — Atyraý qalasynda 24 naýryz kúni jaýǵan jańbyrdan keıin ortalyq kópirdiń ústinen ótip bara jatqan eki adamdy tok soqqan. Búginde olardyń densaýlyq jaǵdaıy nasharlap ketken.
Zardap shekkenderdiń biri Nazakat Atababaevanyń sózinshe, kópir ústindegi shuńqyrdaǵy elektr jelileri ashyq jatqan. Ótip bara jatqan kezde munshalyqty qaýiptiń bolaryn bilmeı jelini basqan. Saldarynan toq soqqan.
— Alǵashynda elektrshokker soqqandaı kúıge tústik. Bul jaǵdaıǵa deıin qolymda temir boldy. Ol 6 aı turý kerek edi. Qolym isip, kógerip aýyrǵan soń aýrýhanaǵa kelip aldyryp tastadym. Tipti ájethanaǵa da barý qıyndady. Aıaǵymdaǵy tamyrlar aýyrsynyp, júrý qıynǵa soqty, — dedi 17 jastaǵy turǵyn Nazakat Atababaeva.
Zardap shegýshiniń sózinshe, alǵashqy medıtsınalyq kómek kórsetken kezde dárigerler ústerinen órttiń ıisi shyǵyp turǵanyn aıtqan. Jalpy bul jaǵdaıdan keıin eki azamattyń densaýlyǵy syr bergen. Olar oqys oqıǵaǵa jol bergen kináliler anyqtalyp, jaýapkershilikten qashyp qutylmasa eken deıdi.
Atyraý qalasy ákimdiginiń ókilderi bolsa kináliler sot arqyly anyqtalady, zardap shekkender medıtsınalyq saraptamany negizge alyp, shaǵymdana alady dep otyr.
— Azamattardyń densaýlyǵyna baılanysty shaǵymy bolsa medıtsınalyq saraptamany negizge alyp, sotqa júginedi. Sottyń sheshimin ákimdik oryndaýǵa mindetti. Jalpy bul jaǵdaı elektr jelileriniń qysqa tuıyqtalýynan bolǵan, — dedi Atyraý qalasy ákimdiginiń resmı ókili Ǵasyrbek Tólegen.
Atyraý oblystyq PD baspasóz qyzmetiniń málimetinshe, osy oqys oqıǵaǵa qatysty qylmystyq is qozǵalǵan. Qylmystyq kodekstiń 306-baby, ıaǵnı qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý boıynsha is tergelip jatyr. Qazirgi ýaqytta kúdikti tarapty anyqtaý jumysy júrip jatyr.
Buǵan deıin Pavlodar oblysynda daýyldan eki áıel zardap shekkeni jóninde jazǵan edik.
