Atyraýdaǵy munaı ken ornynda adam ólimine ákelgen jarylystyń sebebi aıtyldy
ASTANA. KAZINFORM — Atyraý oblysyndaǵy Ońtústik-Shyǵys Novobogat ken ornynda bolǵan óndiristik apattan bir adam qaza tapqan.
Bul týraly TJM Munaı-gaz jáne munaı óńdeý ónerkásibindegi memlekettik baqylaý jáne qadaǵalaý basqarmasynyń basshysy Ahan Telmanov málimdedi.
Oqıǵa 8 mamyrda qurylys-montaj jumystary kezinde bolǵan. RVS-1000 rezervýarynda jarylys bolyp, keıin órt shyqqan. Saldarynan merdiger uıymnyń qyzmetkeri kóz jumdy.
— Apatty tekserý barysynda rezervýar ishinde munaı, gaz jáne aýadan turatyn jarylǵysh qospa jınalǵany anyqtaldy. Ol jumys kezinde tutanǵan. Tekserý qorytyndysynda rezervýardy jumysqa daıyndaý kezinde talaptardyń tolyq saqtalmaǵany, gaz quramyn baqylaýda jáne jumysqa ruqsat berý tártibinde kemshilikter bolǵany belgili boldy, — dedi basqarma basshysy.
TJM ókili mundaı jaǵdaılardyń sebepteri munaı-gaz nysandarynda jıi qaıtalanatynyn aıtty. Olardyń qatarynda jabdyq pen qubyrlardyń tutastyǵynyń buzylýy, korrozııa, dánekerleý aqaýlary, munaı men gazdyń aǵýy, sondaı-aq óndiristik baqylaýdyń álsizdigi bar.
Jalpy 2026 jyly qaýipti óndiristik nysandarda jeti apat tirkelgen.
Aıta keteıik, buǵan deıin munaı-gaz nysandaryndaǵy apattarǵa ne sebep bolatyny habarlandy.
