Atyraýdaǵy Mııaly aýylynyń kóshelerin erigen qar sýy basty

ATYRAÝ. KAZINFORM – Atyraý oblysyndaǵy Mıaly aýylynyń kóshelerin erigen qar sýy basty. Seısenbiden beri aýyl kóshelerinen 1486 tekshe metr sý soryldy.

Atyraý oblystyq tótenshe jaǵdaılar departamentiniń baspasóz qyzmetinen málim etkendeı, 19 naýryz saǵat 15:02-de qar sýyn sorý astalǵan. 

«Qyzylqoǵa aýdanyndaǵy Noǵaıty jáne Saǵyz ózenderindegi sý deńgeıi baqylaýǵa alyndy. Osy maqsatta tótenshe jaǵdaılar departamenti men jergilikti ákimshiliktiń birlesýimen arnaıy baqylaý beketteri uıymdastyryldy. Al, Mııaly aýylynyń kóshelerinen erigen qar sýyn sorýǵa №10 órt sóndirý bóliminen 6 qyzmetker, 2 motopompa, jergilikti atqarýshy organnan 2 qyzmetker, 1 tehnıka jumyldyryldy. Seısenbi, 19 naýryzdan búgingi túske deıin Mııaly aýylyndaǵy kóshelerden 1486 tekshe metr qar sýy sorý jumysy júrgizildi. Erigen qar sýynan aýyldaǵy turǵyn úılerge tónip turǵan qaýip joq. Qazir aýyldaǵy jaǵdaı qatań baqylanyp otyr», - dep habarlady departamenttiń qoǵammen baılanys toby.

Eske sala ketelik, buǵan deıin Atyraý oblysynda júk kóligi jol jıegine shyǵyp ketkenin habarlaǵan edik.