Atyraýdaǵy Mııaly aýylyna tirelgen sýdyń deńgeıi – 1 metr 20 sm

ATYRAÝ. KAZINFORM – Oıyl ózeniniń arnasynan asqan tasqyn sý Atyraý oblysyndaǵy Mııaly aýylynyń irgesine tirelip tur. Sýdyń deńgeıi – 1 metr 20 sm.

Mııaly – Atyraý qalasynan shalǵaıda ornalasqan Qyzylqoǵa aýdanynyń ortalyǵy. Qazir bul aýylda 7650 adam turady. 

Aýdan ákimdiginiń málimetine súıensek, bıyl Mııaly aýylyn tasqyn sýdan qorǵaý úshin 2,7 shaqyrymdyq bóget bıiktetilgen. Qazir bógettiń bıiktigi – 2 metr. 

«Bóget aýyldy tasqyn sýdan qorǵaıdy. Qazir evakýatsııa ýaqytty tıimdi paıdalaný úshin jarııalanyp otyr. Dúrbeleńge salynyp, úreıge berilmeý qajet», - dep habarlady aýdandyq ákimdikten. 

Búgin túsqaıta aýdandyq ákimdik tótenshe jarııalady. Soǵan sáıkes, Mııalydaǵy turǵyndardy qaýipsiz jerge kóshirýge sheshim qabyldandy. 

«Turǵyndardy qabyldaý úshin Y.Shórekov atyndaǵy mektep-gımnazııa, H.Dosmuhamedov atyndaǵy orta mektep pen «Nur-Shýaq» balabaqshasy daıyndaldy. Birinshi kezekte áıelder, balalar, naýqas adamdar, úsh toptaǵy toptaǵy múgedekter kóshiriledi», -dep málim etken edi ákimdikten. 

Eske sala ketelik, budan buryn Atyraý oblysynyń qansha eldi mekenine tasqyn sý qaýpi tónetinin jazǵan bolatynbyz. 

Keıin Atyraý oblysynda sý tasqynyna baılanysty 190-nan astam qabyldaý beketi daıyndalǵanyn habarlaǵan edik. 

Atyraý oblysyndaǵy sý basý qaýpi bar aýmaqtar men jolda qubyr men kópirler tekserildi. 

Sondaı-aq, Qyzylqoǵa aýdanynda birneshe aýyldyń turǵyndary qaıyqpen qatynaıtynyn habarladyq. 

Al, búgin dál osy aýdanda tótenshe jaǵdaı jarııalandy.