Atyraýdaǵy memleket menshigine ótken aýmaqtaǵy úıler buzylyp jatyr
ATYRAÝ. KAZINFORM — Atyraý qalasynda jyl sońyna deıin 100-den astam jeke turǵyn úı men apatty jaǵdaıdaǵy 8 kóppáterli úı buzý josparlanyp otyr. Bul jumys qaladaǵy birqatar aýmaqty qamtıdy.
Atyraý qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń málimetinshe, memleket menshigine alynǵan úıler Baımuhanov, Amandosov, Áýezov kóshelerinde, «Turǵyndar qalashyǵy» yqshamaýdanynda, qalanyń eski bóligi men syrtqy aýmaǵynda ornalasqan.
Qazirgi ýaqytta Baımuhanov pen Amandosov kósheleriniń qıylysyndaǵy 46 jeke turǵyn úıdi buzý jumysy júrip jatyr. Bul jer telimderi memleket muqtajy úshin alynǵan.
— Jumys qazan aıynda bastaldy. Jyl sońyna deıin aıaqtaý kózdelgen. Ashyq elektrondy konkýrs nátıjesinde «Enerdjı sıstem» JShS merdiger bolyp anyqtaldy. Qazir jumysqa 20 tehnıka men 10-ǵa jýyq adam jumyldyrylǵan, — dedi Atyraý qalalyq turǵyn úı-kommýnaldyq sharýashylyq jáne turǵyn úı ınspektsııasy bóliminiń bas mamany Eldar Qarıpollaev.
Buzylatyn úılerdiń qatarynda apatty dep tanylǵan 8 kóppáterli turǵyn úı de bar. Alaıda olardy buzý merzimi turǵyndardy jańa baspanamen qamtamasyz etý máselesine baılanysty bolyp otyr. Ol úshin jańa páterler satyp alý nemese qurylysy júrip jatqan turǵyn úılerdi aıaqtaý qajet. Bul jumys bıýdjetten tıisti qarajattyń bólinýine qaraı júzege asady dep túsindirdi sheneýnikter.
Qazirgi ýaqytta bul aýmaqtarda qandaı nysandar salynatyny naqty belgilenbegen. Qala bıliginiń aıtýynsha, jer ýchaskeleriniń aldaǵy ýaqytta qalaı paıdalanylatyny qalanyń bas jospary bekitilgennen keıin belgili bolady.
Bas jospar jobasynda ortalyqtaǵy jeke turǵyn úı sektorynyń bir bóligin renovatsııalaý usynylǵan. Bul aýmaqtarda kópqabatty turǵyn úıler, qoǵamdyq-iskerlik nysandar, áleýmettik jáne bilim berý mekemeleri, demalys keńistikteri ornalasýy múmkin.
Renovatsııa qarastyrylǵan aýmaqtardyń biri Qurmanǵazy kóshesi, Beıbarys dańǵyly, Sátbaev kóshesi men Jaıyq ózeni aralyǵynda ornalasqan. Ekinshi aýmaq Jandosov, Baımuhanov, Temirhanov kósheleri men Jaıyq ózeni aralyǵyn qamtıdy.
