Atyraýdaǵy maı aýystyrý ortalyǵynda GAZel órtenip ketti

ATYRAÝ. KAZINFORM – Atyraýdaǵy maı aýystyrý ortalyǵynda GAZel júk kóligi órtenip ketti.

Atyraý oblystyq Tótenshe jaǵdaılar departamenti qoǵammen baılanys tobynyń málimetinshe, órt týraly búgin, 27 mamyr saǵat 11:10-de habar berilgen.

«Atyraý qalasynyń Mıras shaǵyn aýdanynda ornalasqan maı aýystyrý ortalyǵynyń aldynda GAZel markaly júk kóligi órtendi. Kóliktiń ıesi 1982 jylǵy júrgizýshi órt sóndirýshilerdiń kómegine júgindi. Qutqarýshylar kólik órtin saǵat 11:21-de oqshaýlap, tolyqtaı sóndirildi», - dep habarlady departamenttiń qoǵammen baılanys toby.

Júk kóligin sharpyǵan órtti sóndirýge Atyraý qalasyndaǵy №14-órt sóndirý bóliminiń 6 qutqarýshysy men 1 tehnıka jumyldyryldy. Ázirge kólik órtiniń tutaný sebebi belgisiz bolyp otyr. Qutqarýshylar jalynnyń shyǵý sebebin anyqtaýǵa kiristi.

«Júrgizýshilerden avtokóliktegi órt erejelerin qatań saqtaýdy suraımyz. Órt ókinishke ulasar tosyn jaıtqa ulasýy múmkin ekenin esten shyǵarmaǵan jón», - dep málim etti departamenttiń qoǵammen baılanys tobynan.

Eske sala ketelik, buǵan deıin Atyraý oblysynda 250 tonna pishen bes saǵatta janyp ketken edi.