Atyraýdaǵy mal bazarynda ólgen sıyrdan sibir jarasy anyqtalǵan

ATYRAÝ. KAZINFORM — Atyraý qalasynda tórt túlik satatyn 5 bazar bar. Sonyń birinde ólgen sıyrdan sibir jarasy anyqtalǵan.

Bul týraly búgin áleýmettik jelide aqparat tarady. Bazar qyzmetkeri 12 qarashada bir sıyrdyń ólip jatqanyn baıqaǵan. Keıin ólgen múıizdi iri qaranyń Batys Qazaqstan oblysynan ákelingeni belgili bolǵan. 

Veterınarııalyq baqylaý jáne qadaǵalaý komıteti Atyraý oblystyq aýmaqtyq ınspektsııasy basshysynyń ýaqytsha mindetin atqarýshy Nurken Baıarovtyń aıtýynsha, mal bazary jabylǵan. 

«Qazir bazar jabyldy. Mundaǵy malǵa tolyqtaı vaktsınatsııa jasalyp, 14 kún baqylaýǵa alynady. Sosyn dezınfektsııa jumystary júrgiziledi. Qala karantınge jabylmaıdy. Basqa jerden mundaı aýrý anyqtalǵan joq», — deıdi Nurken Baıarov.

Mal satatyn kásipkerler bazar 14 kúnge jabylatynyna alańdaýshylyq bildirip otyr. Óıtkeni, mal satylmaǵandyqtan, kásipkerler shyǵynǵa batýy múmkin. 

«Bazardaǵy maldyń bári ólgen sıyrdyń qasynda turdy. Shynymen aýrý bolsa, sonyń qasynda turǵan mal da ólmeı me?», — deıdi Aıdos Sáıfedenov. 

Taǵy bir kásipker Mahambet Maqatovtyń aıtýyna qaraǵanda, bazarda turǵan maldyń qońyn ketirmeý úshin jem-shóp qajet. 

«Bazardy 2 aptaǵa jabylsa, munda turǵan malǵa jem-shóptiń shyǵynyn kim óteıdi? Bul bizge qosymsha shyǵyn ǵoı», — dedi Mahambet Maqatov. 

Búgin ólgen sıyrdan sibir jarasy anyqtalǵany týraly qorytyndy shyqqan. Endi mamandar mal ıelerin de tekserip jatyr.

Al, bazar aýmaǵynda 56 sıyr, 79 qoı, 7 jylqy tur. 

Sondaı-aq, qala aýmaǵynda mal satylatyn ózge bazarlarda da tekserý júrgizý kózdelip otyr.

Eske sala ketelik, buǵan deıin Atyraý oblysynda jyl basynan beri kókjóteldiń 144 jaǵdaıy tirkelgenin jazǵan bolatynbyz.