Atyraýdaǵy Mahambet aýdanynyń jedel shtaby kúsheıtilgen jumys rejımine kóshti

ATYRAÝ. KAZINFORM – Atyraý oblysyndaǵy Mahambet aýdanynyń jedel shtaby kúsheıtilgen jumys rejımine kóshti. Buǵan Jaıyq ózenindegi sý deńgeıiniń 8 metr 12 santımetrge jetkeni sebep bolyp otyr.

Osyǵan baılanysty Mahambet aýdanynyń ákimi Qaırat Nurlybaev jedel shtbatyń jıynyn ótkizip, kúsheıtilgen jumys rejımine kóshý qajettigi týraly sheshim qabyldady.

Aýdan ákiminiń aıtýynsha, Jaıyq ózeniniń jaǵalaýynda 65,5 shaqyrym bóget turǵyzylyp, nyǵaıtylǵan. Bógettiń bıiktigi – 2,5 metr.

«Jaıyq ózeniniń deńgeıi kún saıyn kóterilip keledi. Bizdiń aýdan úshin sý tasqyny qaýpi ózekti másele bolyp qala beredi. Qorǵanys bógetterin salý jumystary aıaqtalǵanymen, qosymsha nyǵaıtý jumystary áli júrgizilip jatyr. Aýdandyq ákimdiktiń qyzmetkerleri, máslıhat depýtattary, aýyl turǵyndary, eriktiler eldi mekenderdi sý tasqynynan qorǵaýǵa jumylyp otyr», -dedi Qaırat Nurlybaev.

Mahambet aýdanynyń jedel shtabynda talqylanǵan máseleler men usynystar boıynsha ár aýyldyq okrýgte jaýapty mamandar bekitildi. Arnaıy kestege sáıkes táýlik boıy kezekshilikti aýdandyq máslıhattyń depýtattary, belsendiler men aýdan ákimdiginiń ókilderi atqarady.

Atyraý oblystyq jedel shtabynyń málimetinshe, Mahambet aýdanynda Jaıyq ózeniniń qaýipti shegi – 8 metr 50 santımetr.

Biraq, keshe, 2 mamyrda keshki saǵat 20:00-de Jaıyq ózeniniń Mahambet aýdanyndaǵy deńgeıi 8 metr 3 santımetrge jetti. Al, búgin, 3 mamyrda tańerteńgi saǵat 8:00-de ózen sýy 8 metr 12 santımetrdi qurady.

«Mahambet aýdanynda Jaıyq ózeniniń sýy bir táýlikte +17 santımetrge kóterildi. Qaýipti deńgeıge deıin 38 santımetr qaldy», -dep habarlady oblystyq jedel shtabtan.

Eske sala ketelik, buǵan deıin Mahambet aýdanynda Jaıyq ózeniniń deńgeıi 8 metrden asyp ketkenin jazǵan edik.

Al, búgin Inder aýdanynda Jaıyq bir táýlikte 38 santımetrge kóterildi.