Atyraýdaǵy lotos alqaby basty týrıstik baǵytqa aınaldy — oblys ákimi

ASTANA. KAZINFORM — Bıylǵy jartyjyldyqta Atyraýǵa 83 myńnan astam týrıst kelgen. Ásirese, ortaǵasyrlyq Saraıshyq pen Qıǵash ózenindegi Lotos alqaby týrızmdi damytýdaǵy basty baǵyttarǵa aınalǵan. Bul týraly óńir ákimi Serik Shápkenov eseptik kezdesýinde aıtty. 

— Bıyl 247,9 shaqyrym jol jóndeldi. Nátıjesinde jaqsy jaǵdaıdaǵy joldardyń úlesi 78%-dan 83%-ǵa deıin ósti. Jolaýshylarǵa sapaly qyzmet kórsetý úshin avtojol, avıa jáne temirjol tasymalynda da jańartý jumystary jalǵasyp jatyr. 90 jańa avtobýs satyp alynyp, onyń 48-i paıdalanýǵa berildi, — dedi Serik Shápkenov Ortalyq kommýnıkatsııalar qyzmetinde.

Budan bólek, Atyraý qalasynyń temirjol vokzaly men aýdandardaǵy 9 temirjol vokzaly jańǵyrtylyp jatyr. Áýe qatynasyn damytý boıynsha «Ashyq aspan» rejımi aıasynda 6 jańa baǵyt ashyldy.

— Bul kórsetkish aldaǵy jyldary 10 baǵytqa jetedi. Hıýaz Dospanova atyndaǵy halyqaralyq áýejaıdy jańǵyrtýǵa 2026 jylǵa 50 mln dollar kóleminde ınvestıtsııa tartyldy, — dedi oblys ákimi.

Bıylǵy jartyjyldyqta óńirge 83 myńnan astam týrıst kelip, kórsetkish byltyrǵymen salystyrǵanda 19%-ǵa artqan. Týrızmdi damytýǵa baǵyttalǵan ınvestıtsııa kólemi de eki esege ósip, 32 mlrd teńge boldy.

— Týrızimdi damytýdaǵy basty baǵyttar — ortaǵasyrlyq Saraıshyq pen Qıǵash ózenindegi Lotos alqaby. Bıyl alǵash ret Qıǵash ózenindegi tabıǵı lotos alqabynda halyqaralyq Lotus Fest festıvali ótti. Sharaǵa 20 myńnan astam týrıst qatysty, — dedi Serik Shápkenov.

Aıta keteıik, Atyraý oblysynda 20 jańa joba iske asyrylyp, 1 300-den asa jumys orny ashylady.

Sondaı-aq, Atyraýda kásipkerlikti damytýǵa 9 mlrd teńge bólingen.