Atyraýdaǵy Qurmanǵazy ótkizý beketin jańǵyrtý jumysy júrip jatyr
ATYRAÝ. KAZINFORM — Atyraý oblysyndaǵy Qurmanǵazy shekaralyq ótkizý beketin jańǵyrtý jumysy bastaldy. Joba aıasynda jańa alty jolaqty avtokólik joly men shekaralyq tekserý ǵımarattary salynyp, bekettiń táýliktik ótkizý qabiletin úsh esege arttyrý josparlanyp otyr.
Bul jobanyń qajettiligi birneshe jyldan beri aıtylyp kele jatyr. Óıtkeni beket mańynda avtoturaq nemese kútý aımaǵynyń joqtyǵy Atyraý — Astrahan tasjolynyń Bókeıhan aýylynyń tusyndaǵy bóliginde uzyn-sonar kezekke sebep bolyp otyr.
Qazir qurylys jumysy shekaranyń eki jaǵyndaǵy 17 gektar aýmaqta júrgizilip jatyr. Munda árqaısysy úsh jolaqty eki avtokólik joly salynyp, jańa ákimshilik ǵımarattar boı kóteredi. Bul tranzıttik júk kólikteriniń shekaradan ótýin jeńildetýge múmkindik bermek.
— Qazirgi ýaqytta nysanda jer qazý jáne irgetas qalaý jumysy júrip jatyr. Rekonstrýktsııa aıaqtalǵannan keıin kólik qozǵalysy kireberis jáne shyǵaberis aǵyndaryn tolyq bólý qaǵıdaty boıynsha uıymdastyrylady. Ár baǵytqa jeke qozǵalys jolaqtary, ákimshilik, memlekettik kirister organdarynyń ǵımarattary, pasporttyq baqylaý kabınalary, sondaı-aq ınspektsııalyq-tekserý keshenderi qarastyrylady, — dep málimdedi «QazAvtoJol» UK Atyraý oblystyq fılıaly.
Joba aıasynda Qazaqstan aýmaǵynda servıstik aımaq ta jasaqtalady. Onda kólik turaǵy men júrgizýshilerge arnalǵan jataqhana qarastyrylady. Qurylys alańynyń basshysy Rústem Kenetulynyń aıtýynsha, júk kólikteri úshin arnaıy kútý oryndary uıymdastyrylady.
— Jolda kedergi bolmaýy úshin 270 júk kóligine arnalǵan avtoturaq bolady. Sol jerde elektrondy tablo ornatylady. Tabloda qaı kóliktiń nómiri kórsetilse, sol mashınalar kezekpen qozǵalyp, shekaradan ótedi. Reseı tarapynan kele jatqan kólikter úshin de avtoturaq qarastyrylǵan, -dedi qurylys alańynyń basshysy Rústem Kenetuly.
Ázirge Qurmanǵazy ótkizý beketi eki jolaqty júıemen jumys istep tur.
— Atyraý — Astrahan tasjoly aıaqtalǵannan keıin júk tasymaly birshama artty. KamAZ, Gazel sııaqty kólikter kóbeıdi. Bul bizdegi saýda-sattyq pen kásipkerlikke úlken paıdasyn tıgizip otyr. Jańa bekettiń qurylysy da jergilikti turǵyndarǵa múmkindik berip jatyr. Qazirgi tańda 70-ke jýyq adam jumyspen qamtylǵan, — dep pikir bildirdi Qurmanǵazy aýdandyq ákimdiginiń resmı ókili Ernar Boranǵalıev.
Jańa ótkizý beketinde kelesi jyldan bastap tranzıttik jolaýshylar úshin elektrondy kezek júıesin engizý josparlanǵan. Jańǵyrtý jumystary keler jyldyń qazan aıynda aıaqtalýǵa tıis.
Buǵan deıin EAEO-nyń ishki shekarasyndaǵy qoldanystaǵy 39 pýnkttiń 37-sinde rekonstrýktsııa júrgizilip jatqany jóninde jazǵan edik.
