Atyraýdaǵy qurylys alańynda 2 jumysshy 5-qabattan qulap, 1-eýi kóz jumdy

ATYRAÝ. KAZINFORM – Atyraýdaǵy qurylys alańynda 2 adam 5-qabattan qulap ketti. Onyń 1-eýi oqıǵa ornynda mert boldy.

Bul derekti Atyraý oblystyq polıtsııa departamentiniń baspasóz qyzmeti rastady. Oqıǵa 20 qańtarda bolǵan. 

– Kúndizgi saǵat 11:15 shamasynda Atyraý qalasynda salynyp jatqan turǵyn úı kesheniniń qurylys alańynda eki jumysshy 5-qabattan qulaǵany anyqtaldy. Oqys oqıǵa ornynda 43 jastaǵy er adam aýyr jaraqattyń saldarynan mert boldy. Al 33 jastaǵy er adam túrli dene jaraqatymen oblystyq aýrýhanaǵa jetkizildi, -dep habarlady departamenttiń baspasóz qyzmeti. 

Qazir atalǵan oqıǵaǵa baılanysty sot-medıtsınalyq saraptama taǵaıyndaldy. Qylmystyq is qozǵaldy. Soǵan sáıkes keshendi tergeý amaldaryn júrgizý bastaldy. 

Eske sala ketelik, budan buryn Atyraýda 45 jastaǵy áıel turǵyn úıdiń 8-qabatynan qulap, mert bolǵanyn habarlaǵan edik.