Atyraýdaǵy Qulsary qalasynan 4,3 mln tekshe metr tasqyn sý soryldy
ATYRAÝ. KAZINFORM – Atyraý oblysyndaǵy Qulsary qalasynan 4,3 mln tekshe metr tasqyn sý soryldy.
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Qulsary qalasynda tasqyn sýdyń zardabyn joıý jumysy jalǵasyp jatyr. Osy kezge deıin 4 mln 300 myńǵa jýyq tekshe metr sý sorylǵan. Al Jylyoı aýdany ákimdiginiń málimetine súıensek, tasqyn sýdan jeke ıeliktegi 2920 jáne kópqabatty 19 úıge zaqym kelgen. Soǵan baılanysty 3878 turǵynnan bir rettik áleýmettik kómek alýǵa ótinish túsken. Qazir 3591 ótinishtiń ıesine 100 aılyq eseptik kórsetkish mólsherinde áleýmettik kómek berildi.
«Qulsary qalasynda 18 sáýirde sý basqan nysandardy dezınfektsııalaý qolǵa alyndy. Sol kúnnen 4 mamyrǵa deıin 2033 jeke ıeliktegi, 11 kóppáterli úı, 28 áleýmettik, 60 ákimshilik jáne kásipkerlik nysanǵa dezınfektsııalaý jumysy júrgizildi. Osy kezeńde 318 qoı-eshki, 9 múıizdi iri qara, 3 túıe, 528 taýyq, 55 ıt óleksesi joıyldy», - dep habarlady aýdandyq ákimdikten.
Turǵyndardan shyǵyndy óteýge qatysty 2818 ótinish qabyldanyp otyr. Sondaı-aq, turǵyndar 24 sáýir-4 mamyr aralyǵynda 695 qoı-eshki, 102 sıyr, 54 jylqy, 32 túıe, 543 taýyq joǵalǵany jóninde ótinish bergen.
Eske sala ketelik, buǵan deıin Serik Shápkenov Qulsarydaǵy sý basqan úılerdi baǵalaýdy eki aptada aıaqtaýdy tapsyrǵan edi.
