Atyraýdaǵy Qulsary qalasynan 12 myńnan astam adam evakýatsııalandy

ATYRAÝ. KAZINFORM – Atyraý oblysyndaǵy Qulsary qalasynan 12 myńnan astam adam evakýatsııalandy.

Atyraý oblystyq jedel shtabtyń málimetine súıensek, Jylyoı aýdanynda tótenshe jaǵdaı jarııalanyp, turǵyndardy evakýatsııalaý jumystary júrip jatyr. 

«Qulsary qalasynan 12 myńnan astam adam qaýipsiz orynǵa kóshirildi. Evakýatsııalanǵan adamdardyń 5 myńy – balalar. Turǵyndar Atyraý qalasyna, Jylyoı aýdanynda ornalasqan «Teńiz ken ornyndaǵy vahtalyq qalashyqqa jáne Mańǵystaý oblysynyń Beıneý aýdanyna evakýatsııalandy», - dep habarlady oblystyq shtabtan.

Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy. 

Kúndiz Qulsarydan Dossorǵa deıingi joldyń bir bóligin sý basty. 

Keshe tasqyn sý Qulsary qalasyna kire bastaǵanyn habarlaǵan edik. 

Atyraý oblysynyń ákimi qaýip áli seıilmegeni, jaǵdaı óte kúrdeli ekenin aıtqan edi. 

Sý basqan Qulsarydaǵy aýrýhanadan 77 naýqasty Mańǵystaý oblysyna aparatynyn jazǵan bolatynbyz.