Atyraýdaǵy kópirlerdiń jaǵdaıyna júrgizýshilerdiń kóńili tolmaıdy
ATYRAÝ. KAZINFORM – Atyraý qalasyndaǵy kópirlerdiń jaǵdaıyna júrgizýshiler tarapynan aıtylyp jatqan syn kóp. Ásirese, Avangard jáne Turǵyndar qalashyǵy yqsham aýdanyn baılanystyratyn, Abaı kóshesindegi ortalyq jáne «Atyraý» yqsham aýdany arqyly ótip jatqan Ǵabbas Berǵalıev kóshesindegi kópirdiń jaǵdaıy adam aıarlyqtaı. Jyl saıyn ondaǵy shuńqyrlardy bitep, jamap-jasqaǵanymen másele túbegeıli sheshiler emes.
– Qazirgi ýaqytta Ǵabbas Berǵalıev kóshesindegi aınalma kópirdiń jaǵdaıy máz emes. Kólik aǵyny – kóp. Shuńqyr-tesikten qashqanymyzben mashınanyń júris bóligin búldirip jatyrmyz. Aýa-raıy qubylyp turǵan ýaqytta mashınany aıdap otyrǵan júrgizýshiler jol kólik oqıǵasyna túsýi múmkin. Jyl saıyn kópirlerdegi shuńqyrlardy biteıdi. Jańbyr nemese qar jaýǵannan keıin sol shuńqyr qaıta paıda bolady. Kópirlerdiń tehnıkalyq jaǵdaıyna baǵa berip, ortasha nemese kúrdeli jóndeýden ótkizý kerek dep oılaımyn, - dedi kólik júrgizýshisi Ǵallam Ýahıtov.
Atyraý qalasy ákimdiginiń aqparatyna súıensek, oblys ortalyǵyndaǵy kópirlerge ázirge ortasha jóndeý jumysyn júrgizý josparda joq. Tek kún jylynǵanda oıly-shuńqyrlardy jamap jan baqpaq. Jolǵa jaýapty mamandardyń sózinshe, 3 jyl buryn kópirlerdiń jaǵdaıyn zerdeleý jumysy júrgizilgen. Mundaı tekseris bıyl da bolmaq.
– 2023 jyly Atyraý qalasynyń barlyq kópiriniń jaı kúıi boıynsha tehnıkalyq zerdeleý jumystary júrgizildi. Nátıjesinde kópirlerdiń apatty jaǵdaıda ekeni anyqtalǵan joq. Oń qorytyndysy shyqty. Ǵabbas Berǵalıev kóshesinde ornalasqan aınalma kópirdiń deformatsııalyq tegistigi sodan shyqqan aqaýǵa baılanysty deformatsııalyq shoptaryn jyl saıyn kútip ustap otyramyz. 2026 jyly kún jylynǵan ýaqytta mindetti túrde deformatsııalyq shopty ashyp, shyǵyp turǵan temirlerin qaıta qalpyna keltirip, betin tegistep, jabatyn bolamyz, - dedi Atyraý qalalyq jolaýshylar kóligi jáne avtomobıl joldary bóliminiń bas mamany Qýanyshbek Qabdyǵalı.
Jergilikti bılik áli kúnge ortalyq kópirdiń taǵdyryna núkte qoıa almaı keledi. Bul kópir buzyla ma, álde kúrdeli jóndeýden óte me, ázirge bul suraqqa jaýap joq. Ortalyq kópirdiń máselesin byltyr Qytaıdan kelgen kompanııa da zerdelep ketken. Ákimdik tarapynan áli kúnge sheshim qabyldanǵan joq. Eske salaıyq, ortalyq kópir 1965 jyly salynǵan. Keıin bir ret kúrdeli jóndeýden ótken.
Aıta keteıik, qazirgi ýaqytta Atyraý qalasynda Jaıyq ózeni arqyly ótip jatqan 6 kópir bar.
Osyǵan deıin Pavlodarda salynyp jatqan jańa kópirden órt shyqqanyn habarlaǵan edik.