Atyraýdaǵy Qıǵash ózeninde sý deńgeıi túsip jatyr
ATYRAÝ. KAZINFORM – Atyraý oblysyndaǵy Qıǵash ózeninde sý deńgeıi tómendep jatyr. Qazgıdromet pen jergilikti atqarýshy organdardyń málimetinshe, ózendegi gıdrologııalyq ahýal turaqty, al sý deńgeıi qaýipti mejeden aıtarlyqtaı tómen bolǵandyqtan turǵyndarǵa qaýip tónip turǵan joq.
Qazgıdromettiń 8 maýsymdaǵy deregine sáıkes, Qıǵash ózeniniń Bókeıhan gıdrobeketindegi deńgeıi 258 santımetrdi qurap, bir táýlikte 2 santımetrge tómendegen. Bul kórsetkish qaýipti deńgeıden (518 sm) edáýir tómen.
Al Qıǵash ózeniniń Shortanbaı aýyly tusyndaǵy gıdrobeketinde sý deńgeıi 400 santımetr bolyp, ótken táýlikte 3 santımetrge azaıǵan. Bul tusta qaýipti shek – 555 sm.
Sharon ózeniniń Qurmanǵazy aýylynda ornalasqan beketindegi deńgeı – 272 santımetr. Mundaǵy qaýipti deńgeı 422 santımetr dep belgilengen.
Qurmanǵazy aýdandyq ákimdiginiń aqparatyna súıensek, ózen arnasynyń jaǵdaıy, sý ótkizý qabileti men sý deńgeıi kún saıyn qadaǵalanyp otyr. Qosymsha qorǵanys jáne aldyn alý sharalary uıymdastyrylǵan.
– Ózendegi gıdrologııalyq ahýal turaqty baqylaýda. Sý deńgeıiniń kóterilýi kóktemgi tabıǵı maýsymdyq qubylysqa sáıkes júzege asýda jáne eldimekenderge, turǵyn úılerge nemese sharýashylyq nysandaryna qaýip baıqalmady. Qosymsha qorǵanys sharalary men aldyn alý jumystary uıymdastyryldy. Mamandardyń málimetine sáıkes, sý kóleminiń artýy baqylaýdan tys jaǵdaıǵa jetken joq, - dep málimdedi aýdan bıligi.
Buǵan deıin jyl basynan beri Qurmanǵazy aýdanynan ótip jatqan Qıǵash ózeniniń sý deńgeıi 1 metrge jýyq kóterilgenin jazǵan edik.
