Atyraýdaǵy keptelisti azaıtatyn jobany aıaqtaý merzimi taǵy bir jylǵa uzardy
ATYRAÝ. KAZINFORM – Bıyl Atyraý qalasyndaǵy soltústik aınalma joldyń eki ýchaskesin tolyq aıaqtap, paıdalanýǵa berý josparlanyp otyr. Bul týraly «QazAvtoJol» UK» AQ Atyraý oblystyq fılıalynyń dırektory Ardaq Qaıredenov málimdedi.
Onyń aıtýynsha, jyl sońyna deıin «Atyraý — Dossor» avtojolynan Jaıyq ózenine deıingi 11 shaqyrym jol bóligi, sondaı-aq «Atyraý — Astrahan» jáne «Atyraý — Oral» baǵyttary toǵysatyn qıylys iske qosylady. Al Jaıyq ózeni arqyly ótetin kópir men oǵan aparatyn kirme joldardyń qurylysy 2027 jyldyń sońyna deıin aıaqtalady dep josparlanyp otyr.
Joldyń uzyndyǵy 27,5 shaqyrymdy quraıdy. Jospar boıynsha bul jumys alǵashynda 2024 jyly aıaqtalýy tıis edi. 2025 jyly kópirlerdiń jobasyna ózgertýler enýine baılanysty 2026 jylǵa shegerildi.
Joba qalanyń kólik ınfraqurylymyn aıtarlyqtaı jaqsartýǵa baǵyttalǵan. Atap aıtqanda, ol qala ishindegi qozǵalysty jeńildetip, jol keptelisin azaıtýǵa, tranzıttik kólikter aǵynyn qysqartýǵa jáne ekologııalyq ahýaldy jaqsartýǵa múmkindik beredi.
— Bul jol qurylysy úsh kezeńnen turady. Birinshi kezeń — «Atyraý — Dossor» tasjolynan Jaıyq ózenine deıingi baǵyt, ekinshi kezeń — «Atyraý — Astrahan» jáne «Atyraý — Oral» joldarynyń qıylysy, úshinshi kezeń — Jaıyq ústindegi kópir men oǵan kirme joldar. 2026 jyly alǵashqy eki kezeńdi tolyq aıaqtaýdy kózdep otyrmyz, — dedi Ardaq Qaıredenov.
Sonymen qatar, fılıal dırektory jol qurylysyna paıdalanylatyn materıaldar qatań baqylaýdan ótetinin atap ótti.
Onyń sózinshe, materıaldar jetkizilgen sátten bastap tekserilip, jol salý aıaqtalǵannan keıin de sapasy qaıta qaralady. Atqarylǵan jumystarǵa eki jyldyq kepildik merzimi qarastyrylǵan.
Búginde jol negiziniń tómengi qabatyn tóseý boıynsha 12,15 shaqyrym jumys atqarylyp, qalǵan 14,85 shaqyrym aldaǵy kezeńge josparlanǵan. Joǵarǵy qabatyn salý jumystary da ishinara júrgizilgen. Bul baǵytta 27 shaqyrymnyń 9,87 shaqyrymy aıaqtalyp, 17,13 shaqyrymy qaldy. Búgingi kúnge deıin asfalt-beton jamylǵysynyń joǵarǵy jáne tómengi qabattaryn tóseý jumystary áli bastalmaǵan.
Eske salsaq, soltústik aınalma joldyń qurylysy 2023 jyldyń shilde aıynda bastalǵan. Bul jobaǵa Eýropalyq qaıta qurý jáne damý banki tarapynan 28 mlrd teńge bólingen. Joba sheńberinde Jaıyq jáne Qaraózek ózenderi arqyly kópir salý, sondaı-aq «Atyraý — Astrahan», «Atyraý — Aqtóbe» jáne «Atyraý — Inderbor» tasjoldary qıylystarynda jol ótkelderin turǵyzý josparlanǵan.
Eske salaıyq, osyǵan deıin Shymkentte sapasyz salynǵan 170 mln teńgeniń jol jabyny qaıta tóselgenin habarlaǵan edik.