Atyraýdaǵy qandy oqıǵa: Aqbaıan Muqanǵalıevanyń adam óltirý faktisine qatysy joq
ATYRAÝ.KAZINFORM – Atyraý oblysy Jangeldın aýylynda bútin bir otbasynyń ólimine qatysty Sultan Sarsemalıevtiń áıeli, marqumdardyń qyzy men baýyry esepteletin Aqbaıan Muqanǵalıevanyń adam óltirý faktisine qatysy joq ekeni belgili boldy.
Atyraý oblysy prokýrorynyń kómekshisi Jandar Bolatbektiń aıtýynsha, Aqbaıan Muqanǵalıevanyń tarapynan adam óltirý boıynsha quqyqbuzýshylyq anyqtalmaǵan.
— Óltirý faktisine qatysy bolmaǵandyqtan oǵan qatysty qylmystyq qýdalaý toqtatylyp, qylmysty habarlamaý deregi boıynsha bólek is tirkeldi. Ol boıynsha quqyqtyq baǵa berilgen joq. Aqbaıan Muqanǵalıevanyń kúdikti retinde isi saralanbady. Oǵan qatysty bultartpaý sharasy qoldanylǵan joq, — dedi Jandar Bolatbek.
Prokýrordyń aıtýynsha, Almatyda onyń psıhıkalyq jaǵdaıyna baılanysty saraptama júrgizildi. Degenmen qorytyndy áli prokýrorlarǵa jetpegen.
— Saraptama qorytyndysy daıyn boldy degen aqpar bar. Biraq biz alǵan joqpyz. Qorytyndy bizge keledi, zerdelenedi. Taǵy da qosymsha saraptama qajettiligi týyndasa qosymsha saraptama taǵaıyndalady, -dep tolyqtyrdy oblys prokýrorynyń kómekshisi Jandar Bolatbek.
ıAǵnı, onyń is-áreketine psıhıkalyq jaı-kúıi tolyqtaı belgili bolǵannan keıin baǵa berilmek.
Sońǵy málimet boıynsha, Aqbaıan Muqanǵalıeva Almatydan Atyraýǵa keri kelip, oblystyq psıhıkalyq ortalyqta jatyr.
4 adamnyń ólimine kúdikti dep tanylǵan Sultan Sarsemalıevke qatysty sot protsesi 18 mamyr kúni saǵat 11:00–ge josparlanyp otyr. Іs ashyq formatta qaralady.
Ótken aptada Sultan Sarsemalıevke qatysty sotqa deıingi tergep-tekserý aıaqtalǵan edi.
Eske salaıyq, kúdiktige qatysty QR Qylmystyq kodeksiniń 99 baby 2 bóliginiń 1 tarmaǵyna sáıkes, ıaǵnı eki jáne odan da kóp adamnyń ólimi, mal satý, kartalardy jymqyrý syndy derekteri boıynsha QR Qylmystyq kodeksiniń 188 jáne 190 baby boıynsha qylmystyq is qozǵalǵan edi.
Buǵan deıin sot medıtsınalyq saraptamasy men tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵan.
