Atyraýdaǵy kanaldan 519 keli óli balyq jınalyp, 2 300 tiri móńke qutqaryldy

Atyraý oblysyndaǵy Tuzdy kóline quıatyn kanaldan 519 keli óli balyq jınaldy. Al, 2 300 dana tiri móńke Jylyoı aýdanyndaǵy Qamyskól kóline jiberildi, dep habarlaıdy Kazinform.

Jaıyq-Kaspıı oblysaralyq basseındik balyq sharýashylyǵy ınspektsııasynyń baspasóz qyzmetinen málim etkendeı, 2 qańtarda kanalda móńke balyǵynyń qyrylǵany anyqtalǵan.

«Balyqtyń qyrylý sebebin anyqtaý úshin arnaıy jumys toby quryldy. Top quramyna Balyq sharýashylyǵy ǵylymı-óndiristik ortalyǵy, Atyraý oblysy boıynsha Ekologııa departamenti, Jylyoı aýdanynyń prokýratýrasy men jergilikti atqarýshy organdardyń qyzmetkerleri engizildi. Jumys tobynyń músheleri 2 qańtarda balyq qyrylǵan kanalǵa baryp, tekserý júrgizdi. Zerthanalyq taldaý júrgizý maqsatynda ólgen balyq pen kanal sýynan synama alyndy. Kanaldan 3 qańtarda jergilikti ýaqytpen saǵat 18:00-ge deıin 519 keli óli balyq jınaldy. Al, 2 300 dana tiri móńke Jylyoı aýdanyndaǵy Qamyskól kóline jiberildi», -dep habarlady ınspektsııanyń baspasóz qyzmeti.

Mamandardyń túsindirýinshe, aldyn boljamǵa sáıkes, móńke balyǵynyń qyrylýyna otteginiń jetispeýi sebep bolýy múmkin. Óıtkeni, aýa temperatýrasy tómendep, kanalda muz qatqan.

«Zerthanalyq taldaýlardyń qorytyndysymen balyqtyń qyrylý sebebi anyqtalady. Taldaý nátıjesi týraly qosymsha habarlanady», - dep málim etti ınspektsııanyń baspasóz qyzmetinen.

Belgili bolǵandaı, Tuzdy kóline quıatyn kanaldyń uzyndyǵy – 3 shaqyrym. Buryn munda balyqty qutqarý jumysy qolǵa alynbaǵan. Kanal arqyly Jylyoı aýdanynyń ortalyǵy – Qulsary qalasyn kóktemgi tasqynnan qorǵaý úshin artyq sý Tuzdy kóline jiberilip kelgen.

Eske sala ketelik, budan buryn Atyraý oblysynda balyq qyrylyp jatqanyn habarlaǵan edik.

Keıin kanaldan 441 keli ólgen balyq jınalǵanyn jazǵan bolatynbyz.