Atyraýdaǵy qamys órti: Aýada lastaýshy zattar shekti mólsherden asqan
ATYRAÝ. KAZINFORM – Atyraý oblysynda 8 qazannan beri Kaspıı teńiziniń jaǵalaýynda qamys órtenip jatyr. Qamys órtine sońǵy eki kúnde tikushaqpen 61 tonna sý tógilgen.
Atyraý oblystyq tótenshe jaǵdaılar departamenti memlekettik órt baqylaý basqarmasynyń bastyǵy, azamattyq qorǵaý podpolkovnıgi Baǵdat Abdýllınniń aıtýynsha, qamys órtin sóndirý áli jalǵasyp jatyr.
«Kaspıı teńiziniń jaǵalaýyndaǵy qamys órtiniń alǵashqysy 7 qazanda anyqtaldy. Órt Qurmanǵazy aýdanyndaǵy Qurmanǵazy aýylynan 43 shaqyrym, Isataı aýdanynyń Zıneden aýylynan 56 shaqyrym qashyqtyqtaǵy aýmaqta anyqtaldy. Ekinshi órt keshe, 9 qazanda «Aqjaıyq» memlekettik tabıǵı rezervat aýmaǵynda tutandy. Qazir ańshylyq maýsymy ótip jatyr. Qamys órtiniń tutanýyna ańshylardyń dalada ot jaǵýy men temeki tuqylyn tastaýy sebep bolýy múmkin. Sońǵy eki kúnde tikushaqpen qamys órtine 31 tonna sý tógildi», -dep habarlady Baǵdat Abdýllın.
Onyń aıtýyna qaraǵanda, Kaspıı teńiziniń jaǵalaýyndaǵy qamys órtine kólikpen jetý qıyndyq týdyryp otyr. Óıtkeni, órt sýly, batpaqty jerde tutanǵan.
«Qazir departamentte 123 tehnıka bar. Jergilikti ákimdikke batpaqty aýmaqta órtti sóndirýge qajetti shynjyrly tabandy, jol talǵamaıtyn traktor túrindegi arnaıy 4 tehnıkany satyp alýǵa usynys berildi», -dep málim etti Baǵdat Abdýllın.
Oblystyq ekologııa departamenti basshysynyń mindetin atqarýshy Erlan Esenovtiń deregine súıensek, Atyraý qalasynyń birneshe bóliginde tútinniń ıisine baılanysty atsosferalyq aýanyń sapasyna monıtorıng júrgizilgen.
«Monıtorıng kezinde kúkirtti sýtek, kómirtek, azot dıoksıdi sekildi lastaýshy zattardyń ıngrıdentteri qamtyldy. Aýaǵa taraǵan zııandy zattardyń shekti mólsherden asý deregi tirkeldi», -dep málim etti Erlan Esenov.
Eske sala ketelik, buǵan deıin 7 qazanda Kaspıı teńiziniń jaǵalaýyndaǵy 5 gektar aýmaqta qamys órtenip jatqanyn jazǵan edik.
Al, 8 qazanda Kaspıı jaǵalaýyndaǵy qamys órtin sóndirýge tikushaqpen 30 tonna sý tógildi.
Sondaı-aq, keshe Atyraýda «Aqjaıyq» tabıǵı rezervatynyń aýmaǵynda qamys órtendi.
