Atyraýdaǵy qamys órti 69 gektardy sharpydy: órt tolyq sóndirilgen joq
ATYRAÝ. KAZINFORM – Atyraý qalasyna qarasty Erkinqala aýyldyq okrýginen Kaspıı teńizi baǵytyna qaraı shamamen 40 shaqyrym jerde ornalasqan Isataı jáne Mahambet aýdandarynyń shekarasyndaǵy jetýi qıyn batpaqty aýmaqta qamys órti áli de tolyq sóndirilgen joq. Qazir 5 gektar aýmaq órtenip jatyr.
7 shilde saǵat 15:00-degi málimetke sáıkes, aldyn ala esep boıynsha órt 69 gektar aýmaqty sharpyǵan. Onyń 53 gektary tótenshe jaǵdaılar qyzmetiniń kúshimen sóndirilse, taǵy 11 gektarynda jalyn ózdiginen óshken. Qazirgi ýaqytta 5 gektar aýmaqta janý baıqalady.
Órtti sóndirý jumystary batpaqty ári tehnıka óte almaıtyn ashyq aýmaqta júrgizilip jatyr. Oqıǵa ornynda Atyraý oblystyq Tótenshe jaǵdaılar departamentiniń 34 qyzmetkeri men 7 tehnıkasy, «Aqjaıyq» memlekettik tabıǵı rezervatynyń 10 qyzmetkeri men 5 tehnıkasy, sondaı-aq jergilikti atqarýshy organnyń 11 qyzmetkeri men 5 tehnıkasy jumyldyrylǵan.
Atyraý oblystyq TJD bastyǵynyń birinshi orynbasary Ábdildá Baekeevtiń aıtýynsha, órttiń tez taralýyna qatty jel sebep bolyp otyr.
– Órttiń tez taralýyna qatty jel áser etti. Qazirgi ýaqytta 5 traktor jerdi jyrtyp, jumys istep jatyr. Jaǵdaı turaqty. Órt jaqyn arada tolyqtaı aýyzdyqtalady, – dedi Ábdildá Baekeev.
Tótenshe jaǵdaılar departamentiniń málimetinshe, qazirgi ýaqytta eldi mekenderge qaýip tónip turǵan joq. Órtti tolyq sóndirý jumystary jalǵasyp jatyr.
Aıta keteıik, keshe bastalǵan órttiń aýmaǵy alǵashynda 34 gektardy sharpyǵan edi.
