Atyraýdaǵy Inderbor kentiniń bir bóligi elektr qýatynan ajyratyldy

ATYRAÝ. KAZINFORM – Atyraý oblysynda Inderbor kentiniń bir bóligi elektr qýatynan ajyratyldy. Jer astyndaǵy qubyrdan shyqqan sýdy joıýdy qaýipsiz júrgizý úshin osyndaı sheshim qabyldanǵan.

Inder aýdanynyń ákimi Daryn Shamuratovtyń aıtýynsha, Inderbor kentinde qubyrdan aqqan sýdy joıý jumysy júrip jatyr.

«Joıý jumystaryn qaýipsiz júrgizý úshin Inderbor kentiniń bir bóligi elektr qýatynan ajyratyldy. Sýdy Jaıyq ózenine aıdaý jumysy júrgizilip jatyr. Apatty ýchaskeniń aınalasynda úsh deńgeıli bóget salynýda. Jaǵdaı baqylaýǵa alyndy», - dedi Daryn Shamuratov.

Eske sala ketelik, budan buryn Atyraý-Oral trassasynan Inderge baratyn joldy sý basý qaýpi qaıta tóngenin habarlaǵan bolatynbyz.