Atyraýdaǵy Hıýaz Dospanova atyndaǵy áýejaı qurylysy 2026 jyly aıaqtalady
ASTANA. KAZINFORM - Hıýaz Dospanova atyndaǵy Atyraý áýejaıynyń jańa aerovokzal kesheniniń qurylysy 2026 jyly aıaqtalady. Bul týraly QR Kólik mınıstri Marat Qarabaevtyń Atyraý oblysyna jumys sapary barysynda belgili boldy.
Azamattyq avıatsııa komıtetiniń habarlaýynsha, qurylymdyq sala basshysy áýe aılaǵyn aralap, nysannyń qazirgi jaǵdaıyn tekserdi. Osylaısha, katarlyq ınvestor 2025 jyldyń basynda jańa áýejaı kesheniniń qurylysyn bastaıdy jáne ınfraqurylymdy tolyq jańǵyrtý men keńeıtýdi, sondaı-aq qazirgi áýejaı ǵımaratyn jańartýdy júzege asyrady. Osy maqsattar úshin sheteldik ınvestorlar shamamen 50 mıllıon dollar ınvestıtsııa tartýdy josparlap otyr.
Jańa aerovokzal kesheniniń aýdany 16.500 sharshy metrdi quraıdy. Investor nysandy 3 jańa teleskopııalyq trappen jabdyqtaıdy.
Atyraý qalasy Jaıyq ózeniniń boıyndaǵy Shyǵys pen Batystyń túıisken jerinde ornalasqandyqtan, ǵımarattyń negizgi kelbeti ortaǵasyrlyq Saraıshyq qalasyn eske salatyn shyǵys mádenıetiniń stılinde salynady dep kútilýde. Ǵımarattyń perronǵa qaraıtyn beti vıtrajdy terezelermen batystyq stılde mınımalızm standartynda salynady. Sizderdiń nazarlaryńyzǵa eskızderdi usynamyz.
Esterińizge sala keteıik, búginde áýejaı arqyly aptasyna 7 baǵytta (Astana, Almaty, Shymkent, Aqtaý, Aqtóbe, Oral jáne Taraz) 89 ishki turaqty reıster oryndalady. Sonymen qatar, aptasyna 6 baǵyt boıynsha 21 halyqaralyq turaqty reıster (Kýtaısı, Amsterdam, Stambýl, Antalııa, Sharm-el-Sheıh, Máskeý) oryndalýda.
Qurylys jumystary aıaqtalǵan soń jolaýshylar aǵyny jylyna 800 myń jolaýshydan shamamen
2 944 myń jolaýshyǵa deıin ósedi dep kútilýde. Sondaı-aq, ushýlar keńistigin aıtarlyqtaı keńeıtý josparlanýda. Eń aldymen Eýropa men Azııanyń tanymal týrıstik baǵyttaryna jańa reıster ashylady. Bul jolaýshylarǵa baǵyttardy keńirek tańdaýǵa jáne aımaqtyń halyqaralyq kólik qoljetimdiligin jaqsartýǵa múmkindik beredi.
