Atyraýdaǵy gaz-hımııa kesheni aqaýlar joıylǵan soń qaıta iske qosyldy

Atyraý oblysyndaǵy 5 maýsymda jóndeýge toqtatylǵan gaz-hımııa kesheni polıpropılen shyǵarýdy qaıta bastady, dep habarlaıdy QazAqparat tilshisi.

«Gaz-hımııa kesheninde josparly jóndeý jumystary aıaqtaldy. Qazir keshenniń barlyq tehnologııalyq qondyrǵysy shtattyq rejımde jumys isteýge kóshirildi. Keshende polıpropılen óndirý bastaldy», - dep habarlady «KPI Inc.» JShS-niń baspasóz qyzmeti.
Keshende Teńiz ken ornynan jetkizilgen shıkizatpen jylyna 500 myń tonna polıpropılen shyǵarylady. Bul – álemdegi polıpropılen óndirisiniń 1 paıyzyn quraıtyn, ári Qazaqstandaǵy munaı-gaz ónerkásibin órkendetýge septigi tıetin polıpropılen shyǵaratyn alǵashqy keshen.

Keshenge amerıkalyq Lummus Technology Inc kompanııasynyń Catofin jáne Novolen tehnologııalary ornatylǵan. Osyǵan uqsas keshender álemniń Saýd Arabııasy, AQSh, Belgııa, Ońtústik Koreıa jáne Qytaı sekildi bes elinde bar.
Eske sala ketelik, buǵan deıin Atyraýda gaz-hımııa kesheniniń jumysy ne sebepti toqtatylǵanyn  habarlaǵan edik.
KRІ JShS-niń basqarma tóraǵasy - bas dırektory Danııar Tıesov keshenniń toqtaý sebebin túsindirgen edi.
«Gaz-hımııa kesheniniń jumysyn toqtatý osy sekildi iri kásiporyndarda kezdesip turady. Óıtkeni, iri óndiris ornynyń paıdalanýǵa berilgenine áli bir jyl tolǵan joq. Sol sebepten, keshen qurylysyn júrgizgen merdigerdiń esebinen barlyq anyqtalǵan kemshilikti retke keltirý kózdelip otyr. Biz keshendi 10 shildede toqtatyp, 25 tamyzda qaıta iske qosýdy josparlaǵan edik. Biraq, ony 5 maýsymda toqtaýǵa týra keldi. Óıtkeni, Siemens kompanııasynyń jylý almastyrǵyshynda aqaý baıqaldy», - dep habarlaǵan edi Danııar Tıesov.