Atyraýdaǵy evakýatsııalyq pýnktterdegi turǵyndar túgeldeı úıine oraldy

ATYRAÝ. KAZINFORM – Atyraý qalasyndaǵy evakýatsııalyq pýnktterge ornalasqan turǵyndar túgelimen úılerine oraldy.

Atyraý oblysynyń jedel shtabynan málim etkendeı, Atyraý qalasy 94 evakýatsııalyq pýnkt ashylǵan edi. Onda turǵyndar úshin 10 250 oryn daıyndalǵan.

«Tasqyn sý basý qaýpine baılanysty Mahambet aýdanynyń Taldykól aýylynan kóshirilgen turǵyndar H.Dosmuhamedov atyndaǵy Atyraý ýnıversıteti men APEC joǵary kolledjiniń jataqhanasynda ashylǵan evakýatsııalyq pýnktterge ornalasqan edi. Qaýip seıilgennen keıin atalǵan aýyldyń 180 turǵyny 7 maýsym kúni óz úılerine oraldy. Qazir Atyraý qalasyndaǵy evakýatsııalyq pýnktterde ornalasqan turǵyndar joq», -dep habarlady oblystyq jedel shtaby.

Beıbarys aýyldyq okrýginiń ákimi Seıilbek Zulhashevtyń aıtýynsha, Taldykól aýylynda 221 úı, 1215 turǵyn bar. Al, Atyraý-Oral trassasynan aýylǵa kiretin joldyń uzyndyǵy 7 shaqyrymdy quraıdy. Bul joldy tasqyn sý basty. Keıin joldyń 1 shaqyrymǵa jýyǵy ýaqytsha qalpyna keltirildi.

Eske sala ketelik, buǵan deıin Taldykól turǵyndary úıine qaıyqpen oralyp jatqanyn habarlaǵan bolatynbyz.

Keıin atalǵan aýyldyń turǵyndary úıine oralǵanyn jazǵan edik.