Atyraýdaǵy eń qymbat tender: ákimdik sottan jeńildi

Atyraý oblysynyń mamandandyrylǵan aýdanaralyq ekonomıkalyq sotynyń 2026 jylǵy 25 tamyzdaǵy sheshimimen «Alem Qurylys AQ» JShS-niń talap aryzy tolyq qanaǵattandyrylǵan.

Іs materıaldaryna sáıkes, 2026 jylǵy 10 maýsymda «Atyraý Innovations» JShS men «Alem Qurylys AQ» jáne «KAZPACO» kompanııalarynan quralǵan konsortsıým arasynda nysandy tolyqtaı jobalaý jáne «kilt tapsyrý» formatynda salý shartymen qurylys júrgizýge arnalǵan memlekettik satyp alý kelisimsharty jasalǵan.

Alaıda bes kúnnen keıin, 15 maýsymda «Atyraý Innovations» JShS kelisimshartty birjaqty tártippen buzǵan. Buǵan oblys ákiminiń seriktestikti taratý týraly qaýlysy negiz bolǵan.

Sotta jaýapker tarap kelisimshartty buzý kezinde oblys ákiminiń 15 maýsymdaǵy № 107 qaýlysy qoldanysta bolǵanyn alǵa tartqan. Osyǵan baılanysty seriktestikti taratý rásimi bastalǵandyqtan, sharttyq mindettemelerdi oryndaý múmkin bolmaǵanyn túsindirgen.

Alaıda sot bul ýájdi negizsiz dep tapty. Іs materıaldarynda kórsetilgendeı, zańdy tulǵanyń taratylǵany týraly málimet Ulttyq bıznes-sáıkestendirý nómirleri tizilimine engizilgennen keıin ǵana ony taratý aıaqtalǵan bolyp esepteledi. Al kelisimshart buzylǵan kezde «Atyraý Innovations» JShS memlekettik tirkeýde turǵan.

Buǵan qosa, 2026 jylǵy 16 shildede oblys ákiminiń № 136 qaýlysymen seriktestikti taratý týraly burynǵy sheshimniń kúshi joıylǵan. Osylaısha, kompanııany taratý rásimi toqtatylǵan.

— 2026 jylǵy 16 shildede Atyraý oblysy ákiminiń № 136 qaýlysymen «Atyraý Innovations» JShS-ni taratý týraly 2026 jylǵy 15 maýsymdaǵy № 107 qaýlynyń kúshi joıylǵan. Atalǵan qaýly oǵan qol qoıylǵan kúnnen bastap kúshine engen, — delingen sot sheshiminde.

Sot otyrysyna oblys ákiminiń apparaty men oblystyq kásipkerlik jáne ónerkásip basqarmasynyń ókilderi úshinshi tulǵalar retinde qatysqan. Olar talap aryz boıynsha sheshim qabyldaýdy sottyń qaraýyna qaldyrǵan.

Al jaýapker «Atyraý Innovations» JShS ókili talapqa qarsy bolmaǵan. Ol seriktestiktiń taratylmaǵanyn jáne kelisimsharttyq qatynastardy jalǵastyrýǵa daıyn ekenin málimdepti.

Sot sheshimimen «Alem Qurylys AQ» JShS-niń talaby tolyq qanaǵattandyrylyp, 2026 jylǵy 10 maýsymdaǵy memlekettik satyp alý týraly kelisimshartty birjaqty buzý zańsyz dep tanyldy.

Aıta keteıik, sot sheshimine apellıatsııalyq shaǵym berýge bir aı merzim qarastyrylǵan. Sheshim 25 tamyzda shyqqan.

Sottyń kelisimshartty buzýdy zańsyz dep tanýy jobanyń qurylysy birden bastalady degendi bildirmeıdi. Sot sheshiminde qurylys jumysyn bastaý nemese jobany iske asyrý merzimine qatysty naqty mindetteme júktelmegen. Negizgi daý kelisimshartty birjaqty buzýdyń zańdylyǵyna qatysty bolyp otyr.

Buǵan deıin oblystyq kásipkerlik jáne ónerkásip basqarmasy sot protsesi aıaqtalǵannan keıin memlekettik satyp alý rásimin qaıta ótkizý máselesi qaralatynyn málimdegen edi. 

Atyraý oblystyq kásipkerlik jáne ónerkásip basqarmasy 2026 jyldyń 26 qyrkúıeginde sot sheshimi zańdy kúshine endi.

— Sot sheshimin oryndaý jáne taraptar arasyndaǵy sharttyq qatynastardy qalpyna keltirý maqsatynda 2026 jylǵy 28 qyrkúıekte «Atyraý Innovations» JShS «Elektrondyq qarjy ortalyǵy» AQ-na memlekettik satyp alý veb-portalynda sharttyń qoldanysyn qalpyna keltirý týraly tıisti hat joldady.6 qazanda «Alem Qurylys AQ» JShS-men jasalǵan memlekettik satyp alý týraly sharttyń qoldanysy qaıta qalpyna keltirildi, — dep málimdedi basqarmanyń baspasóz qyzmeti.

Ákimdiktiń resmı aqparatyna súıensek, jobany odan ári iske asyrý boıynsha tıisti jumys júrip jatyr.

Aıta keteıik, ınjenerlik jáne ınfraqurylymdyq joba «Atyraý» arnaıy ekonomıkalyq aımaǵynyń 400 gektar aýmaǵyn qamtıdy. Munda elektr, sý jáne gaz jelileri, káriz júıesi, baılanys jelileri, avtomobıl jáne temirjol ınfraqurylymy salynýy tıis.

Buǵan deıin Atyraýda jarylǵan elektr baǵanalaryn aýystyrý jumysy sozylyp ketkenin jazǵan edik.