Atyraýda ata-enesin óltirdi degen kúdikti Indonezııada ustaldy

ATYRAÝ. KAZINFORM — Qazaqstan Respýblıkasy Іshki ister mınıstrliginiń qyzmetkerleri sheteldik áriptestermen ózara is-qımyl nátıjesinde Indonezııa Respýblıkasynyń Lombok aralyndaǵy Senarý aýylynda asa aýyr qylmys jasady dep kúdikke ilingen er adamdy ustady. Ol QR Qylmystyq kodeksiniń 99-baby 2-bóligi boıynsha kúdikke alynǵan.

Onymen birge buǵan deıin habar-osharsyz ketti dep halyqaralyq izdeýge jarııalanǵan burynǵy jubaıy da anyqtaldy.

— Tergeý derekterine sáıkes, 2025 jylǵy qarasha aıynda Atyraý oblysynda kúdikti uzaqqa sozylǵan turmystyq janjal men paıdakúnemdik nıet negizinde eki adamdy qasaqana óltirýdi aldyn ala josparlap, júzege asyrǵan. Qylmysty jasaǵannan keıin izin jasyrý maqsatynda máıitterdi sharýashylyq qurylysynyń astyna kómip, qan izderin joıǵan, sondaı-aq jábirlenýshilerdiń múlki men qarajatyn ıemdengen.Qazirgi ýaqytta olardy Qazaqstan Respýblıkasyna deportatsııalaý máselesi qarastyrylyp jatyr, — dep málimdedi mınıstrlik.

Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.

6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.

Keıin olardyń denelerinde pyshaq izderi bary belgili boldy.

9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde anyqtaldy. 

Sondaı-aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.

Aqpan aıynyń basynda kúdiktiniń 5 balasy memleket qamqorlyǵyna alyndy.