Atyraýdaǵy dúleı daýyl turǵyn úılerdiń shatyryn ushyryp, elektr jelilerin qıratty

ATYRAÝ. KAZINFORM – Atyraý oblystyq ákimdiginiń baspasóz qyzmeti aýa raıyna baılanysty óńirdegi barlyq qyzmetti úılestirý úshin jedel áreket etý ortalyǵy jumys istep jatqanyn habarlady. 

Oblys aýmaǵynda kesheli beri daýyl turyp, ekpindi jel áleýmettik nysandar men turǵyn úılerdiń shatyryn ushyryp ketken. birneshe aýdanda elektr qýaty óship qalǵan. Atap aıtqanda, tótenshe jaǵdaı Qurmanǵazy, Mahambet, Maqat aýdandarynda jáne Atyraý qalasynda tirkeldi. 

Jergilikti turǵyndar tabıǵı apattan keıingi jaǵdaıdy áleýmettik jelidegi paraqshasynda jarııalap jatyr. Máselen, Almagúl yqshamaýdanyndaǵy 31-úıdiń shatyry ushyp ketken. Al Inder aýdanynyń turǵyndary jaryqsyz qalǵan. 

Atyraý oblystyq ákimdigi baspasóz qyzmetiniń habarlaýynsha, oblysta 14 jeltoqsanǵa qaraǵan túni aýa raıynyń kúrt nasharlap, kúshti tsıklon soqqan. Meteorologııalyq qyzmetterdiń málimetinshe, jeldiń ekpini 25 m/s-tan asty. 

– Qazirgi kezde Atyraý oblysy ákiminiń orynbasary basqaratyn jedel áreket etý ortalyǵy jumys istep jatyr. Jergilikti jáne aýdandyq memlekettik qyzmetter joǵary daıyndyq rejımine qoıyldy, - dep túsindirdi departamentten. 

Sondaı-aq jelden elektr jelileri úzilip, isten shyqqan. Ákimdik apattan naqty qandaı nysandardyń zardap shekkeni týraly aqparatty keıinirek beretinin atap ótti. 

– Oblys boıynsha 25-ten astam brıgada men 40 tehnıka jumyldyryldy. Elektr jelilerin jóndeý boıynsha «Atyraý Jaryq» jaýapkershiligi shekteýli seriktestigi jumys istep jatyr, - dep qosty departamenttegiler. 

Aıta keteıik, atalǵan óńirde kóktaıǵaq saldarynan respýblıkalyq mańyzy bar Atyraý-Oral, Atyraý-Aqtóbe, Atyraý-Beıneý tasjolynda kólik qozǵalysyna shekteý qoıyldy.

Eske salsaq, buǵan deıin BQO-da boranǵa baılanysty birqatar aýdanda elektr jaryǵy óshkenin jazǵanbyz.